Jowai, Jylliew 15
Ka ophis District Social Welfare Officer, Jowai ha ka Sngi Saitjaiñ ka la pynlong ïa ka jingïaid rally da ki arshaka kaba long shibynta ka ‘Nasha Mukt Bharat Abhiyan’ ban pynshai paidbah halor ka jingshyrkhei jong u drok.
Ïa kane ka rally la sdang da ka jingkaweh lama na u Additional SP u Ishan Gupta, IPS na District Library Mynthong, Jowai bad la ïaid lyngba ïa ki jaka jong ka sor Jowai bad pynkut ha Wahiarong, Mihmyntdu lyngba ka jingpynphriang ïa ka khubor jong ka imlang sahlang kaba lait na u drok.
Ha ka jingkren, une u heh pulit u la ban jur ba ka jingpyndonkam drok ka buh ka jingma kaba khraw ïa ki nongpyndonkam kumjuh ïa ka imlang ka sahlang.
Haba batai kum ka jingeh ba la sakhi ha ka pyrthei baroh kawei, u la kdew ba katba ki tnat Sorkar bapher bapher kumjuh ki kynhun seng ki la shim ïa la ki jong ki bynta ban ïakhun pyrshah ïa kane ka jingeh, u la ong ba ka long ruh kaba kongsan kumjuh ïa ka imlang ka sahlang ba kin mih shakhmat ban long ki nongrah khubor na ka bynta ka jingkylla.
Ka Jylla Meghalaya khamtam ka Rilum Jaiñtia ka dei kaba la kyrkhu kyrdoh da ka mariang bad ka jingsuk, ka jingitynnad bad ka jingriewspah ha ka kolshor kaba hiar pateng. Ki nongshong shnong kane ka thaiñ ki dei ban lehkmen halor kine ki jingkyrkhu da kaba pdiang ïa ki rukom im kaba khuid ba suba bad kaba koit ba khiah kiba don tynrai ha ka riti ka dustur – ym lyngba ka jingpyndonkam ïa ki jingdih kiba sniew.
U la khot bad wer ruh ïa baroh ki nongshong shnong ban ïada ïa ka bha ka miat bad pynneh-pynsah ïa ka jingkhlaiñ jong ka imlang ka sahlang na ka bynta ki pateng ban wan.
Shibynta ha ka jingpyrshang kaba dang ïaid shakhmat ban weng ïa ki jingeh kiba ïadei bad ka jingnangkiew ha ka jingdon jong kiba kyrni ha u drok, ki ‘riewshemphang (resource person) kiba kynthup ïa u Bah FGN Ryngnga, District Mission Coordinator, District Hub for Empowerment, Bah D Nongtdu, OC ka thanat Jowai, Bah JK Majaw, Jowai Police bad u Bah C Langstang, Ambassador, Nashamukt Bharat Abhiyan Campaign ki la kdew halor ki sienjam kiba kongsan kiba lah ban ai jingïada, ka jingpynsngewthuh bad pynshai paidbah bad ka jingïatreilang hapdeng ki nongshong shnong.
Ïa kane ka prokram la pynïaid da ka Kong Y Kyndait, Gender Specialist, District Hub for Empowerment of Women, katba ïa ka jingkren ai khublei la ïoh na ka Kong Y Najiar, DSWO, Jowai.
