Shillong, Jylliew 15
Ka Meghalaya Arm Wrestling Association (MAWA) ha ryngkat ka jingsnohkti lang bad ka Bouncers Association of Meghalaya (BAM) lem bad ka Dorbar Shnong Mawlai Nongkwar ka la pynlong ïa ka jingïakhun kti ha surok lane ka Street Arm Fight.
Ïa kane ka jingïakop la pynlong ha Mawlai Nongkwar hapoh ka jingïalam u Bah Junestar Kharbuli, President ka MAWA, ryngkat ka jingdon lang ki nongkitkam ka dorbar shnong ba kynthup ïa u Bah Esekial Mond, Secretary Shnong, Bah Moonstar Rumnong, Rangbah Shnong, Mawlai Nongkwar, Bah Samuel Biam bad kiwei.
Na ka liang ki nongïalam shnong ki la ai ka jingkhublei kyrpang ïa ki nongïalam jong ka MAWA kiba la lah ban wanrah ïa kane ka jingïakhun ha ka shnong jong ki kaba long shibynta ban sei ïa ki sap ki phong jong ki samla bad ki rangbah na kane ka shnong ha ka jinglehkai ïakhun kti.
Na ka liang u President ka MAWA, u la pynsngew ba ka thong hi ka long ban kyntiew ïa kane ka jinglehkai bad ban ïoh ban jied ïa ki samla bad ki rangbah ba kynsai ki ban mihkhmat ym tang ïa ka district hynrei ïa ka jylla bad ïa ka ri baroh kawei.
Haba phai sha ka jingïakhun, ki ‘rang bad ki ‘thei ba kynsai ki la pyneh triang la ki dohksah ban ïapyni bor ha ka jingïakhun kti bad kaba itynnad ka long ba wat ki nongshong shnong ki la poi ban sakhi lang ïa kane ka jingiakhun kaba itynnad bad kaba shongshit.
Ha katei ka sngi, ka MAWA bad ka Dorbar Shnong ka la pynkup burom ruh ïa arngut ki rangkynsai bad kawei ka samla kynthei kiba la wanrah nam bad burom ïa ka shnong kiba kynthup ïa u Pyndapbor Dkhar uba la jop ha ka Overall Men Bermuda bad uba la ïoh khur ïa ka nam jop ba ar ha ka Junior Bodybuilding jong ka SAARC Cham-pionship, nangta u Alexion Roy Mylliem Umlong uba la khur ïa ka takma rupa ha ka Asian Arm Wrestling Championship 2025, bad ka samla Ïamonlang Khar-jana kaba dei ka nongshad ba paw ha ka Hip Hop India Season 2 bad kaba la ïakhun ruh ha ka RDYS 4x qualified IBS Season 4.
