Nongstoiñ, Jylliew 15
U President ka Federation of Khasi Jaiñtia & Garo People (FKJGP) Sengkmie, Bah Dundee Cliff Khongsit u la ong, “Ngi ju kren ïa ki mat kiba long ka stieh ban ïada ïa ka jaidbynriew, namar kum ka jaidbynriew kaba rit paid da lei-lei ngin ym lah ban kheiñ shngaiñ ïa ka jingwan jong kiwei pat ki jaidbynriew sha ka Jylla ka jong ngi.”
U Bah Dundee u la pynpaw ha ka jingïalang pyntian smai ïa ki nongkitkam kiba thymmai jong ka FKJGP Maweit Circle na ka bynta ka samoi treikam u snem 2025-28 kaba la long ha ka Sngi Saitjaiñ ha dorbar hall jong ka shnong Maweit.
“Kumba long mynta, ngi don lang ha ka thup jong ka jingsynshar ka Ri India ïa kaba ngi ïa nujor ïa ki jingbun paid jong kiwei ki jaidbynriew, ka jingbun paid ka jaidbynriew ka jong ngi, ngi long tang ita i um ba shijaw hapoh ka duriaw,” ong u Bah Dundee.
Shuh shuh u Bah Dundee u la ong ruh ba ha kaba ïadei bad ka jingwan buhai shong jong kiwei pat ha kane ka Jylla, ka dei ka kamram jong ki khun samla lane kum ka seng ban kyntu ïa ka Sorkar Jylla ba ka dei ban wanrah ïa kata ka aiñ ban ïada ïa ngi kumba long ha kiwei pat ki Jylla kiba la ïoh ïa ka aiñ ïa kaba la tip kum ka ILP.
U la bynrap ruh da kaba ong, “Kane ka por ka dei ka por ba ngi shu ïaid lynti ha ka jingim ka jong ngi hynrei ka dei ka nongkynti jong ki pateng ki ban sa wan, te ïa kiei ki jingjia ki jinglong ki jingman jong ki pateng ki ban sa wan ki jong ngi, ka dei ha phi ha nga ba ngin rai mynta”.
Ha katei ka jingïalang, u Bah Dundee u la ïoh ruh ban pynskhem bad pyntian smai ïa ki dkhot bad ki nongkitkam jong katei ka jylli ba kynthup ïa u Bah Anthony Umïong, uba la shah jied kum u President ka FKJGP Maweit Pyllun, u Bah Endrius Ryntong kum u Vice President bad 14 ngut kiwei pat kiba bat ïa ki kyrdan bapher bapher.
Ha katei ka sngi la ïadonlang ruh u Bah Tusing Umïong, President ka Synjuk Nongsynshar Shnong ka thaiñ Maweit, u Bah Pynshai Kharbani President ka FKJGP WKHD, u Bah Willes Syiem Vice President ka FKJGP WKHD bad kiwei ki nongkitkam kiba kham hakhmat jong ka FKJGP Sengkmie kumjuh ki dkhot ka KSU Maweit, bad ha katei ka sngi ka FKJGP ka la pynkup burom ruh ïa ki nongkitkam barim jong ka seng.
