Shillong, Jylliew 15
Ka Bharatiya Janata Party (BJP) kaba don lang ha ka sorkar synrop jong ka Meghalaya Democratic Alliance (MDA-II), ka la ai ka jingïaroh ïa u Myntri Rangbah ka Jylla, Conrad K Sangma da kaba ong, “Ha ka jingïalam u Conrad K Sangma ka Jylla ka la kiew bha ha ka jingwanrah ïa ki kam pynroi.”
Ïa kane ka jingpyrto ïa ka sorkar la kren hi da u President ka Meghalaya BJP u Rikman G Momin ba ka seng kan ym weng satia ïa ka jingkyrshan na ka National People’s Party (NPP) kaba ïalam ïa ka Sorkar Jylla.
“Ka Sorkar MDA ka treikam bha khamtam u Myntri Rangbah ka Jylla u trei shitom bha bad ka BJP ruh ka ai ka jingkyrshan ba radbah khnang ban wanrah ïa ki kam pynroi na ka bynta ki paidbah bad ka Jylla hi baroh baroh,” la ong u Rikman.
Lah ban kdew hangne ba ka BJP ka don 2 ngut ki MLA kiba synrop lang hapoh ka Sorkar MDA-II ha kaba uwei u ïoh bat shuki Myntri Sorkar.
Haba kylli halor ka jingïasam shuki Myntri hapdeng ki MLA, u President ka BJP u la jubab da kaba ong ba kane ka kamram ban kylliang shuki Myntri sorkar ngam don eiei ban ong.
“Lada ka por ka la wan hangta ngan sa batai hynrei mynta ngam don eiei ban ong,” la bynrap u Rikman.
