Seoul, Jylliew:
U nongialam ka North Korea, u Kim Jong Un haba iakren bad ki nongthoh khubor bad kum ka khubor ba yn phah sha u President ka Russia- u Vladimir Putin, u la ong ba ka ri jong u kan ïai ïeng ryngkat bad ka Russia haduh kaba kut.
Ha ka kyrwoh na ka bynta ka Russia Day, ka sngi shuti jong ka jingieit ri ban rakhe ïa ka jinglaitluid jong ka Russia, u Kim u la khot ïa u Putin kum u paralok ba ieid tam eh jong u bad u la ïaroh ruh ïa ka jingïadei jong ki arliang mamla kum ka jingïadei kaba shisha hapdeng ki paralok bad para marjan ri.
Hynrei u la ong ba ka jingiatreilang bad ka jingiadei hapdeng ka North Korea bad ka Russia ka dei ka mon sngewbha jong ka DPRK hi bad yn ym don mano-mano ruh ba lah ban pynkhih ne pynsynjor ia ka jing-iadei hapdeng jong kine arliang mamla.
Namar u la ong ruh ba ka DPRK ka ieng na ka bynta ka kyrteng ba shisha jong ka North Korea, kata ka dei ka ‘Democratic People’s Republic of Korea’.
La iathuh ruh ba u Kim ha ka Sngi Palei u la phah ia ka jingai khublei kyrpang sha u Putin- uba long u nong-ialam jong ka Russia halor ka jing-rakhe ia ka jingioh laitluid ka Russia ha katei ka sngi.
Ha kaba sdang jong une u snem, ka North Korea ha ka sien ba nyngkong ka la pyntikna ba ka la phah ïa ki shipai ban ïakhun na ka bynta ka Russia ha ka thma ha Ukraine katkum ka jingbthah jong u nongïalam katei ka ri- u Kim Jong Un hadien ba ka la sngap jar da ki bnai.
