Shillong, Jylliew 15
Kawei ka samla na Uttar Pradesh, kaba kyrteng ka Ujala Yadav ka la kam ba ma ka bad ka Sonam Raghuvanshi, kaba shah kynnoh ba ka la pynïap ïa la u kurim, u Raja Raghuvanshi ha Megha-laya, ki la shong lang ha kajuh ka bos, na Varanasi sha Ghazipur, ha ka miet jong ka 8 tarik Jylliew 2025.
Ka Ujala Yadav, ka samla pule ha ka shnong Holipur (Inamipur) kaba don ha ka thaiñ Saidpur jong ka Ghazipur district, ka la ïathuh ha ki lad pathai khubor, ba ka la ïohi nyngkong ïa ka Sonam, shabar jong ka steshon rel ha Varanasi bad kham hadien, ha kawei ka jaka ïeng bos, ha kaba baroh ar ngut ki shynrang, ki la kiew ha kajuh ka bos.
Haba pynkynmaw ïa ka jingshong bos, ka Ujala ka la ïathuh ba ka Sonam ka la tap ïa ka khmat jong ka bad ka la phong da ka t-shirt rong ïong.
“Ka la shong marjan bad ka jaka shong jong nga. Ha ka jingleit, ka la kyrpad ïa uwei u nongleit-jingleit uba dei u shynrang uba shong hajan jong ka ban pan ïa ka phone jong u ban phone ïa uwei u briew, hynrei u la kyntait,” la ong ka Ujala ha ka kot khubor.
Ka la bynrap ba hadien ba uta u shynrang u la kylla jaka shong, ka Sonam ka la kynriah sha ka liang jong ka bad ka la pan ïa ka phone jong ka. Ka Ujala ka la kdew ruh ba ka Sonam ka la thoh ïa u nombar, nangta ka la pyndam noh shwa ban ai biang ïa ka phone sha ka.
Ka Sonam ka la kyrpad ruh ïa ka ba kan kiar na ki rynsan ‘social media’ bad ban kiar na kaba peit ïa ki khubor halor ka jingjah rngai ki shikurim kiba leit honeymoon sha Meghalaya hadien ba ka la sngewthuh ba ka Ujala ka pule ïa kane ka khubor online. “Wat peit ïa kiei-kiei kiba khlem jingmyntoi,” la ong ka Sonam ïa ka, katkum ka khubor jong ka AajTak.
Ka Ujala ka la ïathuh ruh ba ha ka jingïaid lynti baroh kawei, ka Sonam ka la ïai kylli haduh katno por ka bos kan poi sha Gorakhpur.
“Nga la ïohi ïa ka durkhmat jong ka tang katto-katne sekhon, ha ka por ba ka la shim ïa ka um na ka bilor jong nga bad ka la synreit ha ka khmat jong ka, hadien ba ka la weng noh ïa ka jingsop durkhmat,” la ong ka Ujala, katkum ka khubor jong ka New Indian Express.
“Ha ka step (ha ka sngi kaba bud) haba nga la ïohi ïa ki TV channel, nga la ïohi ïa ka khubor shaphang ka kurim jong u Raja Raghuvanshi kaba la jah bad kaba la mih paw biang hadien 17 sngi ha kawei ka dhaba ha Nandganj, kaba dei ka shnong trai ka jong nga,” la ong ka Ujala bad bynrap “Nga la ithuh mardor ïa ka bad nga la pyrkhat ba ka lah ban hiar hajan ka dhaba ha ka thaiñ Nandganj.”
