Agartala, Jylliew:
Ha ka jingïaid lynti kaba thmu ban khanglad ïa ki kam runar sha shiliang pud, ki shipai Border Security Force (BSF) Tripura Frontier ki la kem ïa lai ngut ki nong Bangladesh bad uwei u nongkhaïi drok na India katba ki la ïoh ban kurup ruh shibun ki tiar ba la khang pyrshah, kynthup ïa ki dawai pynbuaid bad ki tiar Electronics kiba rem dor bha.
Katkum ka kyrwoh khubor ba la pynmih da ka Frontier Headquarter, BSF Salbagan, la ong ba ka jingjia kaba nyngkong ka la jia ha ka 12 tarik, Jylliew, 2025, ha kaba ki shipai jong ka Border Outpost (BOP) Boxanagar ha Sepahijala distrik ki la kem ïa uwei u nong India. La lap ïa une u briew ba u don ïa u Ganja uba khia 48 kilo, u jingdih pynbuaid ba la khang pyrshah.
Ha ka jingkhynra lang kaba kyrpang kaba la pynlong ryngkat ka jingïatreilang bad ki pulit ka tnat Government Railway Police Station (GRP), Agartala bad Ambassa, ki shipai BSF ki la ïoh ban kem ïa lai ngut ki nong Bangladesh na Agartala bad Ambassa Railway Police Station.
Kine kiba shah kem, kiba la ithuh kum ki nongshong shnong jong ka Khulna bad Netrakona district jong ka Bangladesh, ki dei kiba la shah kem halor ka jingrung beaiñ sha ki jaka jong ka ri India.
Shuh shuh, da kaba leh katkum ki jingtip ba kyrpang, ki shipai BSF na BOP Koylatilla kiba hap hapoh Sepahijala distrik ki la pynlong ïa ka jingkhynra kaba kyrpang ha ki jaka ba shadien bad ki la bat ïa kawei ka kali pick-up Mahindra Bolero.
Haba la jurip, la lap ba katei ka kali ka kit 275 tylli ki mobile phone jong ki jait bapher bapher, ha kaba lada kheiñ kyllum lang ki shong dor kumba T. 65 lak.
