Shillong, Jylliew 15
Ka Sorkar Meghalaya ka la pynmih ïa ka hukum ban khang pyrshah ïa ka jingai wai ïa ki kali ar shaka bad saw shaka khlem jingbit ha kylleng ka jylla. Kane ka long shibynta ban wanrah ïa ka jingshngaiñ ïa ki paidbah.
Kane ka jingshim rai ka Sorkar ka la wan hadien ka jingshah pynïap jong u Raja Raghuvanshi ba la kynnoh ba la leh da ka kurim bad lai ngut ki shynrang, kaba la pyn-kyndit ïa ka jylla bad ïa ka ri India baroh kawei, namar kine kiba shah kynnoh naduh ka Sonam Raghuvanshi bad lai ngut ki paralok shynrang jong ka ki la shim wai ïa ki kali ar shaka na ki kynhun bym shym la ‘register’ na Shillong ban pyndep ïa kane ka kam runar ha ka por ba ki leit shangkai sha Sohra.
Ka Sorkar Jylla ha ka hukum jong ka, ka la pynmih ïa ka jingpynbna paidbah kaba tyngeh bha ban khang ban pyndonkam ïa ki kali ar shaka bad saw shaka jong ki ‘riewshimet na ka bynta ban ai wai ha kylleng ka jylla.
Katei ka hukum, kaba la pynmih da ka ophis jong u Commissioner of Transport, ka kren shai ba kum kitei ki kam, ki dei kiba pynkheiñ beit ïa ka aiñ pynïaid kali, 1988.
Katkum ka hukum kaba mynta, ka jylla Meghalaya kam shym la pyntreikam ïa ki skhim kum ka Rent-a-Motorcycle lane ka Rent-a-Cab.
La pynmih ïa ka hukum ba ki briew ne ki seng kim shah ban ai wai ïa la ki kali shimet na ka bynta ki kam khaïi.
Ka tnat Transport ka la pyni ruh ïa ki kyndon aiñ kali, Section 66, kaba khang ban pyndonkam ïa kano-kano ka kali kum ka kali kit mar khlem ka jingai jingbit kaba biang.
Ka kyndon 192A, ka pynshitom ïa ka jingpyndonkam khlem jingbit ïa ki kali na ka bynta ki kam khaïi, ryngkat bad ki kyndon ban daiñ kuna ne kin ngat ban shah set patok.
Kumjuh, ka kyndon 207 ka shah ïa ki bor jong ka aiñ ban kurup ïa ki kali kiba pynkheiñ ïa ki kyndon ai jingbit.
Ka tnat ka la maham ba kino-kino ki briew kiba pynkheiñ ïa kine ki kyndon ban ai wai, kin ngat ha ka jingshah pynshitom tyngeh ha ka aiñ. Kane ka lah ban kynthup ïa ka jingkurup ïa ka kali, ka jingdaiñ kuna bad ngat ha ka jingshah set patok.
