Agartala, Jylliew:
U Myntri Rangbah ka Tripura, u Manik Saha, u la khot ïa ka sorkar pdeng, ba kan pynleit jingmut hakhmat eh ban maramot ïa ki jingker nar kiba la shah pynjulor ha khappud jong ka jylla kaba markhap bad ka Bangladesh.
Da ka jingker pud kaba 856 kms, kumba 80% la ker kut, hynrei ka jingtrei ha ki bynta kiba dang sah ka dang sahkut namar ki jingeh bapher bapher.
Ki bynta jong ka jingker kaba la don lypa ki la sniew namar ki daw jong ka mariang kum ka jingtwa khyndew bad u slap uba jur, katba ki don ki jaka kiba la thmu ban pynjulor da ki nongleh bymman.
“Ha ka jingïalang jong ka NEC ha u bnai Nohprah 2024, nga la pynpaw ïa ka jingdonkam ban maramot kyrkieh bad ban shna ïa ki jingker thymmai ha ki jaka bym pat ker kynroh. Ïa kane ka mat la pynpaw ha ki nongïalam jong ka sorkar pdeng bunsien bad ka don hapoh ka jingpyrkhat jong ki,” ong u Saha, da kaba bynrap ba u thmu ban wanrah biang ïa kane ka mat sha ka jingpyrkhat jong ka Delhi.
Haba kren ïa ki jingeh halor ka jingwan rung tuh, u Myntri Rangbah ka jylla u la kdew ba u la ïakren bad ki shipai ka tnat Border Security Force (BSF) bad kiwei kiwei ki tnad pahara ban pynkhlaiñ ïa ka jingpeitngor bad ban khanglad ïa ki jingïaid lynti be-aiñ.
Katba ka jingkiew kaba la khmih lynti ha ka jingwan rung tuh kam shym la urlong, u Saha u la ban jur ïa ka jingdonkam ban bteng ban peitngor bad ki lad pynkynriah kam kiba treikam na ka bynta ki nongwan rung be-aiñ.
U Myntri Rangbah u la ïashim bynta ruh ha ka jingïalang ha ka ophis treikam jong ka BJP ha ka jylla, ha kaba u la plie paidbah ïa ka “Seva, Sushan, Garib Kalyan of 11 Saal” Campaign, kaba rakhe ïa ki jingjop jong u Myntri Rangbahduh ka ri u Narendra Modi ha kine ki 11 snem ba la leit.
Kane ka jingthmu ka pynpaw ïa ki mawjam ha ki bynta kum ka jingshngaiñ ka ri, ka roi ka par, bad ki prokram ai jingmyntoi na ka bynta kiba duk.
U president jong ka seng BJP ha ka jylla u Rajib Bhattacharjee bad u General Secretary u Bipin Debbarma ki la don lang ha kane ka jingïalang.
