Shillong, Jylliew 15
Ki lai ngut ki shynrang kiba kynnoh donkti ban pynïap ïa u Raja Raghuvanshi ki la sah tang kumba 100 meter eiei la antad na jaka sah ka Sonam bad u Raja haba ki leit sah sha Nongriat ha ka 22 tarik Jymmang 2025.
Kine lai ngut shynrang ki long u Vishal Chauhan, Akash Rajput bad Anand Kurmi ki la leit sah ha Serene Homestay katba ka Sonam Raghuvanshi bad u Raja ki la sahlang ha ka juh ka kamra ha Shipara Homestay kaba don ha Nongriat.
Haba u nonglum khubor u la poi sha Nongriat la ïohi ba kine ar tylli ki jaka sah ki don mar shiliang ka jingkieng jri kaba hapoh ka don ka wah kaba ki nongjngohkai pyrthei ki wan peit ïa ka jingkieng jri bad sum artad.
Ban poi sha ka Shipara Homestay hap jam ïa ka jingkieng jri bad ka Serene Homestay pat ka dei kaba don ha Nongriat, tangba ka dei ka lad ban ïaid kjat sha Tyrna.
Haba u nonglum khubor u la poi sha Shipara Homestay, u Bah Constantine Rnga kum u trai u la ïalam ha jaka sah ka Sonam bad u Raja Raghuvanshi kiba la sah hajrong ha ka kamra number kaba saw (Room No-4) kaba don tang kawei ka kamra thiah kawei ka shuki bad kawei ka miej.
Ha kane ka jaka sah jong kine shikurim, ka long shisha kaba shit namar ka dei ka kamra kaba rit bad kaba la ker da ka kynroh dewbilat, kumta hap ban plie beit da ka pakha ban kham pyngngad.
Katba ka jaka sah jong lai ngut ki shynrang ka kham bun mala kaba ïohi ruh pyrshah ïa ka Shipara Homestay hynrei la shu pynïakhlad ka wah kaba don ka jingkieng jri.
Kane ka jinghiar u nonglum khubor sha Nongriat ka dei hadien ba ka Sonam Raghuvanshi bad kine lai ngut kiba la shah kem ba ki la phla ha ki pulit ba ki la thmu ban pynïap ïa u Raja sha Nongriat tangba ki la kynrandien noh namar kam long kaba shngaiñ ïa ki.
Kumta kine lai ngut ki la mih lang ha kajuh ka por na ki jaka sah kumba mih ka Sonam bad u Raja ha ka por 5:30 mynstep jong ka 23 tarik Jymmang ban kiew sha Mawlakhiat.
Ki pulit ki la ïathuh ba kine ki briew bad ka Sonam ki la ïoh ban pynïap ïa u Raja Raghuvanshi ynda la poi ha Weisawdong kaba kham kynjah bad bret shapoh ka riat ïa ka met.
