Shillong, Jylliew 15
U Myntri ka Sorkar Jylla, u Bah Paul Lyngdoh ula pyntip ba ka kynhun Myntri ka la mynjur ïa ka jingtyrwa ban ai wai ïa ka jaka jong ka MeECL kaba heh 273.41 akar sha ka tnad jngohkai pyrthei na ka bynta 60 snem na ka bynta ban pyntreikam ia ki kam jngohkai pyrthei bapher bapher.
Haba kren sha ki lad pathai khubor hadien ka jingïalang jong ki kynhun Myntri ka jylla ha ka sngi Thohdieng, u Bah Paul Lyngdoh ula ong ba khnang ban pynmih pisa na ka jaka bym pat pyndonkam jong ka Tnad MeECL bad ki tnat treikam jong ka na ka bynta ban pynroi ïa ki projek jngohkai pyrthei ha ka rukom ai wai bad ïasam khajna, ka kynhun Myntri ka la mynjur ïa ka jingtyrwa ha kaba ka tnad bording lyngba ka MeECL ka la rai ban ïakhlad noh bad ka jaka kaba heh 273.41 akar bad ban ai wai ïa ki sha ka tnad jngohkai pyrthei.
U Myntri ula ïathuh ba ki jaka ki kynthup ïa ka IB Campus kaba la don lypa, ka jaka naduh Le-junction baroh shi lynter jong ka dyke, ka RI Shad Sngi haduh ka shnong Nongsdier, ka Thanat Pulit bad baroh ki jaka kiba don shadien jong ka skul MeECL, ki jaka kiba don shadien jong ka NHRDC haduh ka NESAC, ki jaka jong ka block V bad ka Lumpongdeng.
“Kane ka jingpynkylla ïa ka jaka na ka tnad bording sha ka tnad jngohkai pyrthei kan long katkum ka polisi jong ka Sorkar kaba nyngkong eh kata ha ka snem 60 snem bala ai wai ïa ka kaba lah pynjlan da 30 snem,” ong u Myntri.
U Myntri u la ong ba ka Tnad kan siew T.1 shi akar hynrei ka bhah jong ka tnad bording kan long 90% kum ka bai wai na ka bynta ki 60 snem ba nyngkong, kaba lah ban pynjlan da 30 snem.
“Kane ka jingtyrwa ka long ban nang pynkiew bad kyntiew shuh shuh ïa ka kam jngohkai pyrthei ha ka jylla”, ong u Myntri.
Shuh-shuh, u Myntri ula ïathuh ba ka Sorkar kan sa wanrah ïa ki jaka sah ne ki ‘hotel five star’ bad ban wanrah ruh ïa ki jingshakri jong ka Lake Cruise hapoh shisnem ban wan.
“Ngin sa dro ïa ka dur (map) ha kaba ngin pyndonkam bha ïa ka jaka kaba heh bha kaba long 273.41 akar,” bynrap u Myntri.
