Shillong, Jylliew 15
Ka Sorkar India ka la mynjur ïa ka mang pisa kaba long T.951.27 klur na ka bynta ban shna ïa ka Tura Bypass ha Meghalaya, ka ban sa pynïasoh bad ka National Highway 127B bad ka NH-217.
Kane ka surok kaba la pynwandur kum ka ‘two-lane’ ryngkat bad ki jingsiang maw na arliang, ka dei kaba jrong kumba 29.03 kilometer lyngba ka Tura district.
Ïa kane la pynbna da u Myntri ka Ministry of Road Transport & Highways, u Nitin Gadkari ha ka sngi U Blei ba ka Sorkar India ka la mynjur ïa ka song pisa ba T.951.27 klur ban shna ïa ka surok Tura bypass.
Haba thoh ha X, u Gadkari u la ong, “Ha Meghalaya, ngi la mang ïa ka song pisa T.951.27 klur ban shna ïa ka Tura bypass kaba pynïasoh na NH-127B sha NH-217 ka ban dei ka surok two-lane. Kane ka project kaba jrong 29.03 km ha Tura, ka dei ka surok kaba kongsan bha”.
U la ong ba ka NH-217 (ba tip mynshuwa ka NH-51) ka dei ka surok kaba pynïasoh ïa ka Guwahati sha Dalu, kaba don ha khappud ka Bangladesh bad shakri kum ka Inland custom check-post.
Kane ka surok kaba thymmai kan sdang najan jong ka shnong Sanchonggre ha ka surok NH-127B bad kan ïasoh bad ka shnong Jenggitchakgre ha surok NH217, da kaba kiar na ka surok kaba mynta kaba ïaid lyngba ïa ka sor Tura kaba la dap da ki briew.
“Kane ka surok kan ïarap ym tang ban pyllait ïa ka jingkhapngiah ha sor Tura hynrei kan kyntiew ruh ïa ka jingshngaiñ ki nongleit nongwan,” la ong u Myntri.
Ki bor ba dei khmih ki khmih lynti ruh ba kane ka projek kan kyntiew ïa ka jingleit jingwan jong ki mar bad pynkhlaiñ ïa ka jingïadei ha ka thaiñ baroh kawei.
