Shillong, Jylliew 15
U Myntri Rangbah ka Jylla, Conrad K. Sangma u la pynbna ban noh jingïarap pisa T. 30 lak tyngka sha ka Shillong Sports Association (SSA) kum shi bynta ban pynïaid ïa baroh ki lympung ïalehkai jong kane synjuk ha kane ka samoi ïalehkai u snem 2025.
Ïa kane u la pynbna hadien ba u la kyntiew ïa ka lama jong ka SSA, kaba long kum ka dak jingplie paidbah ïa ka samoi ïalehkai mynta ka snem ha ka sngi Saitjaiñ ha SSA Stadium kaba ha First Ground, Polo.
Katei ka sngi ka long ruh ha ka por ka jingsdang ïa ka lympung ïalehkai U-20 Fourth Division League.
Kiwei pat kiba la wan sakhi ki long u Secretary ka Meghalaya State Olympic Association (MSOA) Bah Finely Lad Pariat, u Working President ka SSA Bah Robert Dkhar, ki dkhot ka Tournament Committee, ki dkhot ka Council bad ki rangïalehkai jong 29 tylli ki kynhun.
U Conrad u ai khublei ruh ïa baroh ki dkhot jong ka SSA, halor ka jinglah jong ki ban pyndep lut ïa baroh ki lympung ïalehkai jong ka samoi kaba la dep, da kaba u la pynkynmaw ba kum ka Jylla ka don ïa ka thong ban pynlong ïa ka nongbah Shillong kum ka ‘Capital Football’ jong ka ri.
Kumta ban lah kynjoh ïa kane ka thong ki la don bun bah ki kam ba la pynïaid shakhmat ha ka Jylla hi baroh kawei kum ha kaba shna ïa kiba bun tylli ki madan ïalehkai Artificial Turf, ki Natural Turf Football Stadium, ka CM Fooball Mission, ka stadium ïalehkai phutbol kaba heh kaba la thmu ban tei ha Mawkhanu, ka Football Academy, ne wat ki lympung ïalehkai kiba pynlong ha ka Jylla.
U Conrad u la pynkynmaw ba ka sorkar ha ka samoi ba la dep, ka la wan shakhmat ban ïarap ïa ki lympung ïalehkai ka SSA lyngba ka Chief Minister Special Grant, bad mynta hi ruh ka snem kumba la kyrpad biang ïa u, u la wan shakhmat ban pynbna ba un dang ïai bteng ban kyrshan ïa ka SSA da ka pisa kaba T.30 lak tyngka.
Shuh shuh u Conrad u la ai khublei kitbok kitrwiang ïa baroh ki kynhun ïalehkai bad ki klob ki ban ïakhun mynta ka snem ba kin lah ban paw ïa ka mynsiem ïalehkai ban kynjoh sha ka thong.
Ha katei ka sngi plie, ka SSA ka la pynkup burom ruh ïa ka Batbitbha Bareh bad Lucky Merry Lyngdoh, kiba long ki arngut ki rephri phutbol kiba la pass ïa ka kyrdan National Referee, nalor kata la pynbna ruh ba ka samla Philarima Hynñiewta dangshen ka la pass ïa ka eksamin kum ka Match Commissioner.
