Shillong, Jylliew 15
Ka Golflink SC ka la ïoh jingjop ha kaba sdang ïa ka lympung ïalehkai Under-20 Fourth Division ba la pynïaid da ka Shillong Sports Association (SSA) hadien ba ka la lah ban pynliem noh ïa ka Thynroit SC da 4-3 kol ha ka sngi Saitjaiñ ha SSA Stadium kaba ha First Ground, Polo.
Kane ka nam jop ka la wan urlong lyngba ka kol kaba khatduh ba la thep da u Mebanaibor Nongkhlaw ha shwa ban kut ka jingïalehkai.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Ka Thynroit ka la thep ar kol ha ka kylla step lyngba u Fairlyway Nongspung ha ka minit kaba 10 & 35, hynrei ka Golflink ka la pynphai kylla shi kol lyngba u Banteilang Wahlang (32).
Hadien ba la bteng ïa ka jingïakhun jong ka kylla miet, ka Golflink ka la lah ban pynïakhaid kylla lyngba u Ridonroy Laloo (56) hynrei ka Thynroit ka la thep biang sa shi kol lyngba u Melijohn Sohtun (57).
Hapdeng kane ka jingïakhun, ka Golflink ka la ïoh ban thep biang ïa ka kol kaba lai lyngba u Ribanshan Wahlang (68) na ka bynta ban ïakhaid mar 3-3 kol. Pynban shwa ban wai u Mebanaibor u la lah ban pynurlong na ka bynta ka Golflink hadien ba u la thep ha ka minit kaba 80+2 bad ban khur syndon ïa ka jingjop.
Ha ka jingïalehkai jong ka Group-A ha ka lah sngi U Blei kan long hapdeng ka Mawshbuit SC pyrshah ïa ka Risa Colony SC ha ka por 1:30 mynsngi, katba ha ka Group-B ka Them Rangshken SC pyrshah ïa ka Mawlyngad SC ha ka por 4:15 nohphai sngi.
