Shillong, Jylliew 15
Kum shi bynta ban pynkhreh na bynta ka ilekshon ban wan ha u snem 2028, ka Bharatiya Janata Party (BJP) hapoh ka Jylla ha ka Sngi Saitjaiñ ka la ïoh ban pynthymmai ïa ki nongkitkam na bynta ka samoi treikam 2025-2028.
Haba kren sha ki lad pathai khubor, u President ka seng, Rikman G. Momin u la ong ba kane ka long kum shi bynta ban pynkhreh ïa ka seng na bynta ka ilekshon ban wan hapoh ka Jylla bad kumta, na ka liang u National President ka BJP, u J.P. Nadda u la mynjur ïa ka kynhun treikam bathymmai hapoh ka Jylla ban khmih bniah halor ka jingpynkhreh na bynta ka ilekshon ha u snem 2028.
Ki nongkitkam bathymmai jong ka seng ki kynthup ïa 6 ngut ki State Vice-President, 2 ngut ki State General Secretary, 6 ngut ki State Secretary, uwei u State Treasurer bad uwei u State Joint-Treasurer lem bad 6 ngut kiwei pat ba kynthup ïa u Media Convener, Chief Spokesperson, IT Convener, Social Media Convener, Office Secretary bad State Cells Convener.
Haba kylli, u Momin u la ong ba ka BJP ka pdiang sngewbha ïa baroh ban wan pynïasoh sha ka seng bad ban ïatreilang na bynta ka Jylla baroh kawei.
Ha kawei ka liang, ka kyrwoh na ka seng ka ong ba ïa ka BJP la ju bna na bynta ka saiñdur kaba bniah bad ka jingpynkhreh kloi, kaba ïaineh ha ka tynrai jong ka jingjop (jong ka) na kawei ka ilekshon sha kawei pat, ha kylleng ki Jylla bad ha ka Sorkar Pdeng kumjuh.
Kumta la ieh ïa ka jingshaniah ha kane ka kynhun bathymmai ban pynkhlaiñ ïa ka seng ha ki kyrdan ba sha trai, ban pynsaphriang ïa ka khubor jong u Myntri Rangbahduh ka ri ha man la ki bynta jong ka Jylla, ka khubor jong ka ‘Sab ka Saath, Sab ka Vikaas, Sab ka Biswaas’ – ryngkat bad baroh, ka roi ka par na ka bynta baroh bad kaba lah ban shaniah da baroh.
Shuh shuh kane ka kynhun bathymmai ka pyni ïa ka dak jong ka BJP ka ban trei shit rhem – ka ban ïeng bad long kaba la khreh ban kyntiew bun shah haba ïadei bad ka jingïoh ‘vote’ bad ka jingdon ki nongmihkhmat ha ki ilekshon ban wan hapoh ka Jylla.
