Shillong, Jylliew 15
U Bah PT Sawkmie, MLA barim u la ong ba u Chief Executive Member (CEM) ka Khasi Hills Autonomous District Council (KHADC) u dei uba khmih ïa ka council bad u long kum u kpa uba peit ïa ka jaidbynriew baroh kawei. Kumta u la buh jingkylli, hato kum u kpa uba don ka jingkitkhlieh u hun mo ban pynduh kam ïa la ki jong ki khun ki kti?
U Bah Sawkmie u la pynpaw ba ka kynrum-kynram hapoh KHADC ka la mih hadien ba kane ka EC ba la ïalam da ka Voice of the People Party (VPP) ka la weng kam ïa ki katto-katne ngut ki nongtrei kiba la pynskhem, ki nongtrei kiba dang shu dep thung ha la ka jong ka jong ka post. Kumjuh la ai jingmut ban trei biang kum ki casual staff. Kumba ka high court ba donburom ka la ai ïa ka stay order na ka bynta ki katto katne ngut ki nongtrei, ba ki lah ban trei biang ïa ka kam kaba ki trei mynshwa.
“Kumjuh na ka liang jong nga, nga kyntu ïa u CEM ban weng noh shisyndon ïa ka ‘order’ ba la weng kam ïa kito ki nongtrei bad ban shah ïa ki ban rung biang ha la ki jong ki post bad ki tnat kiba ki don,” ong u Bah Sawkmie.
U la bynrap, “Ngim lah ban len ba kane ka executive committee ka don la ka jong ka polisi, hynrei ka polisi ban weng kam ïa kiba la trei ngim ïahap satia.”
“Nga don ka jingkyrmen ba ka EC kan shong pyrkhat biang sa shisien, khnang ba kito ki nongtrei kiba la shah beh kam kin ïoh mynsiem biang bad ba ki khun ki kti, ki lok, ki bahaïing bahasem kin ïa kmen lang,” pynkut u Bah Sawkmie.
