Shillong, Jylliew 16
Ka Them Rangshken ACC ka la ïoh jingjop ha ka 4th Division Under-20 Football League 2025 ba la pynïaid da ka Shillong Sports Association (SSA), katba ka Mawshubuit SC bad ka Risa Colony SC ki la ïasam mar shi point ha ka Lah Sngi U Blei.
Ha kane ka jingïakhun kaba la long ha SSA Stadium kaba ha First Ground Polo, ka Them Rangshken ka la pynliem noh ïa ka Mawlyngngad SC da 1-0 kol. Kane ka nam jop ka la wan urlong lyngba u Neban Janong, uba la ïoh ban thep ha ka minit kaba 15.
Haba phai sha kawei pat ka jingïakhun kaba la long kham shwa hapdeng ka Mawshubuit SC bad ka Risa Colony SC ki la ïakhaid mar 1-1 kol.
Wat la kine ki kynhun kim shym la lah ban thep kol ha ka kylla step, hynrei ka Mawshubuit ka la lah ban pynurlong na ka bynta ban pynkhih jar lyngba u Lurshai Wankhar ha ka minit kaba 66. Hynrei u Teilas Marweiñ u la lah ban pynurlong na ka bynta ka Risa Colony hadien ba u la ïoh ban thep ha ka minit kaba 76 na ka bynta ban ïakhaid mar shi kol.
Kane ka lympung kan bteng biang ha ka Sngi Ba-ar ha kaba ka jingïalehkai jong ka Group-B kan long hapdeng ka Pynthorbah SC pyrshah ïa ka Lummawbah SC ha ka por 10:30 mynstep, kumjuh ha ka Group-C ka Nongthymmai Raijnongkynrih ïa ka Summit AC ha ka por 1:30 mynsngi bad ka Dilingiem SC ïa ka Lapalang SC ha ka por 4:15 nohphai sngi.
