Jowai, Jylliew 16
Kum shi bynta ban pyn-khreh ïa ka 39th National Games 2027, u Symbud Myntri Rangbah ka Jylla, Bah Sniawbhalang Dhar ha ryngkat ka jingsynran lang u MLA ka Jowai, Bah Wailadmiki Shylla ha ka Lah Sngi U Blei ki la leit ban jurip ïa ka madan Kiang Nangbah Stadium kaba don ha Ladthad-laboh, Jowai.
Ha kane ka sngi la donlang ruh ki nongïalam bad dkhot nongkitkam ka West Jaiñtia District Sports Association (WJDSA) ba kynthup ïa u President Bah E.M.H Passah, u General Secretary Bah Lammat-o Laloo, Vice President Bah Patrik Lamare nalor u Assistant Director ka tnat Sports & Youth Affairs ka Sorkar Jylla bad uba long u District Sports Officer, West Jaiñtia Hills District Bah Khroobok Passah ha ryngkat ki karikor na ka State Sports Council bad PWD.
Ha kane ka sngi u Bah Sniawbhalang u la leit ban jurip ïa ki sawdong saw-kun jong ka madan kynthup ruh ïa ki jaka shong ki nongpeitkai ne Gallery kumjuh ki jaka rung jaka mih jong ki nongïalehkai, ki jaka pynïeng kali nalor kiwei pat.
Te, na ka liang u Symbud Myntri Rangbah u la ïatai sani bha bad ki dkhot ka WJDSA halor ka jinglong jingman jong ka madan, ha kaba u la ai jingmut ruh ïa ki dkhot ka WJDSA ban pynduh noh ïa u Synthetic Track bad ban rah noh ïa ka Gallery kham shakhmat khnang ban kham kylluid khyndiat ka jaka pynïeng kali, hynrei na ka liang ka WJDSA ka la kyntait halor kane ka jingai jingmut da kaba ong dei ban pynbha pynmiat ïa ka madan katkum ka jingshah jong ka jaka bad na ka liang u Bah Sniaw-bhalang ruh u la pdiang ïa katei ka jingkwah jong ka WJDSA.
Haba kren sha ki lad pathai khubor hadien ka jingjurip, u Bah Sniawbha -lang u la ong, ka jingwan jurip jong u ka long ban sdang noh ïa ka kam ban pynbha pynmiat ïa ka madan kaba long shi bynta ka jingpynkhreh ïa ka lympung ïalehkai baheh jong ka ri India ka ban long ha kane ka Jylla.
Haba ïadei bad ka jingpynbha pynmiat ïa ka madan, u Bah Sniawbha -lang u la ong ba ka don ka jingeh khyndiat namar ka jingduna palat ka jaka, hynrei yn pyrshang ban shna katba shah ka jaka. U la ïathuh ruh ïa ka thong ba hakhmat eh ka long ban pynbiang shwa ïa ka Gallery ha baroh saw liang jong ka madan.
Haba ïadei bad ka jaka pynïeng kali (parking), u Bah Dhar u la pynpaw ka jingeh namar ba duna ka jaka hynrei watla katta u la ong ba yn pyrshang ban shna shadien jong ki Gallery bad ruh ban wad ki lad ki lynti ban pynmih surok khnang ban lait na ka jingkhapngiah haba pynlong ïa ki lympung ïalehkai kiba heh.
Naka liang u Bah Wailadmiki u la ong, kum u MLA ka thaiñ u don ka jingthrang jingangnud ban pynbha pynmiat ïa ka Kiang Nangbah Stadium namar ka dei ka madan kaba la rim tam ha rilum Jaiñtia. U la ong ruh ba ka la don ka jingangnud ban pynshna ïa ka madan kumba long ha Wahïajer, hynrei ka long kaba shitom namar kane ka madan ka don hapdeng sor hynrei yn pyrshang ban pynbna pynmiat katba lah.
