Nongstoiñ, Jylliew 16
Ka Brightstar Academy kawei na ki shlem ai jinghikai phutbol kaba don ha sor Nongstoiñ, West Khasi Hills ka la soi ïa ka Memorandum of Understanding (MoU) bad ka Mawkhar Sports Club kaba long kawei na ki klob jong ka nongbah Shillong.
Kane ka jingïasoi soskular ka la long ha ka sngi Thohdieng mynshem taïew, kaba dei ruh artad ka jingrakhe sah kynmaw ïa ka jingdap shi snem jong katei ka shlem ai jinghikai. Ka jingthmu jong kane ka long kum ka jingplie lad ïa ki khynnah napoh kane ka shlem ai jinghikai ba kin ïoh ka lad ban ïuhkjat ha ka nongbah Shillong ban ïalehkai na ka bynta ka Mawkhar SC.
Ym tang katta, ha katei ka sngi na ka liang ka Mawkhar Sports Club ka la ïoh ruh ban ai sngewbha da ka momentos sha ka Brightstar Academy kum ka dak ban kitbok sha ka jingkynjoh shi snem ha ka jingïaid lynti jong ka.
Lah ban kdew hangne ba la ai kyrteng ïa ka Brightstar Academy kum ka dak ban pynsah nam ïa i (L) Brightstar Kharbudon bad la plie ïa kane ka shlem ai jinghikai ha ka 14 tarik u Rymphang 2024 bad la sdang ai jinghikai ha ka 16 tarik u Kyllalyngkot 2025. Ha katei ka por ba la plie ki don 10 ngut ki khynnah, hynrei mynta ki la don haduh 80 ngut ki khynnah kiba dei na kylleng ki jaka jong ka West Khasi Hills.
Nangta, kane ka Academy mynta ka la don ruh ha ka kyrdan ïalehkai Second Division jong ka Nongstoiñ District Sports Association (NDSA) bad la ong ruh ba ha ka 23 tarik u Lber mynta u snem kane ka shlem ai jinghikai ka la ïoh ban plie ruh sa kawei pat ka jaka ai jinghikai ha Mawlyntriang kaba ha Mairang, Eastern West Khasi Hills District.
Ïa kane ka jingrakhe dap shi snem, na ka liang ka Brightstar Academy ka la ïoh ruh ban pynlong ïa ka jingïalang hapoh Mecofed Hall New Nongstoiñ ha kaba u Bah G.J.L Sangriang, Asst. Agril. Engineer (Mech) West Khasi Hills u la long kum kongsan.
Kum ka dak jong ka jingkynmaw ïa ka jingdap shi sn\em jong kane ka shlem ai jinghikai, la ot ruh ïa u cake bad la ïoh ruh ban sam ïa ki syrnod sha ki khynnah ïalehkai Under-12 kiba dei kiba nyngkong kiba wan ban rung bad shah hikai ha katei ka shlem ai jinghikai bad ruh la pynkup burom bad ai sngewbha ruh ïa ki nongïalehkai jong kane ka shlem ai jinghikai kiba don ha ka kynhun (1st team) kiba la lah ban pynkiew sha ka Second Division jong ka samoi ïalehkai 2025 – 2026 ka NDSA.
Nalor u kongsan, la donlang ruh na ka ïing ka sem jong i (L) Brightstar Kharbudon kynthup ïa i kurim Kong Daplin Hoojon, ki khun lem bad ki pyrsa kurim kata u Bah Precioustone Ryntathiang, President ka Brightstar Academy, Bah Abandonmame Lamin, Head Coach, u President ka Mawkhar Sports Club, Bah Ransom Sutnga, Bah Hamar Lyngkhoi uba la kren na ka liang ki kmie ki kpa, ki dkhot jong ka Mawkhar SC, ki nongkitkam ka Brightstar Academy, ki khynnah ïalehkai, ki kmie ki kpa ki ‘riew rangbah bad kiwei kiwei.
