Shillong, Jylliew 16
Hadien ka jingsaphriang ki khubor halor ka jingshah pynïap u Raja Raghuvanshi ha kylleng jong ka Ri India mynha ka 23 tarik Jymmang 2025, mynta la ïohi ïa ka jingsaphriang jong kawei pat ka durkhih ne ka ‘video’ ha ki rynsan ‘social media’ ha kaba la ïohi ba ka Sonam Raghuvanshi ka la ïaid lynti ryngkat bad u Raja Raghuvanshi.
Kane ka durkhih ne ka ‘video’ ba la saphriang ka dei kaba la ïoh ringdur da uwei u nongwan jngohkai pyrthei ïa uba la tip kyrteng u M. Devsingh uba la pyllait ha ka Instagram Account lade katba u dang hiar sha Nongriat ha ka por 9:45 baje eiei mynstep.
Une u briew katba u dang hiar sha Nongriat bad ban ringdur ïa ki jaka ba itynnad ha Nongriat, ka la jia ryngkat ba ha katei ka durkhih u la ïoh ringdur kynsan ïa ki arngut shijur na Indore, Madhya Pradesh, kata ka Sonam Raghuvanshi bad u Raja Raghuvanshi kiba dang kiew na Nongriat.
Ka Sonam Raghuvanshi bad u Raja Raghuvanshi ha katei ka durkhih ba la saphriang ki dang kiew ïa ka lynti ha Nongriat ha ka por mynstep bad la ïohi ruh ba ka Sonam ka ïaid nakhmat ryngkat u diengduh katba u Raja pat u la bud nadien jong ka.
Ha kane ka durkhih, ka Sonam Raghuvanshi ka la phong da ka sopti rong lieh bad ka patlun rong ïong katba u Raja Raghuvanshi pat u la phong da ka sopti rong lieh kaba syriem kum ka baniañ.
Kum ban shu pynkynmaw hangne, kitei shikurim ki la wan ‘Honeymoon’ sha Sohra bad ha ka 23 tarik u Jymmang ki la jah rngai noh bad ïa ka met u Raja Raghuvanshi pat ki pulit ki la lap na ka riat arliang ha Weisawdong bad hadien kane ïa ka Sonam Raghuvanshi pat ki Pulit ki la kem na Uttar Pradesh ryngkat lem bad 4 ngut kiba kynnoh donkti ban pynïap ïa u Raja Raghuvanshi ha kaba la mih ruh ka jingkynnoh ba ka Sonam Raghuvanshi ka donkti lang ban pynïap ïa u Raja Raghuvanshi.
Hadien kumba katto-katne por ka jingpynmih ïa kane ka durkhih ba la ïohi ïa u Raja bad ka Sonam ha ka lynti ban leit sha Nongriat, u M_Devsingh mynta u la pyllait sa ïa kawei pat ka durkhih ha kaba la suba ba la ïoh ban ring dur sa ïa ki 3 ngut kiba donkti ban pynïap ïa u Raja Raghuvanshi kiba la ïaid lynti ban kiew na Nongriat bad kine ki long u Akash Rajput, Vishal Chauhan bad u Anand Kurmi
Kitei ki lai ngut ha katei ka durkhih ba la saphriang ki dang kiew ïa ka lynti ha Nongriat bad kine ki durkhih baroh ar tylli kiba saphriang mynta ki dei ki durkhih ba la ïoh ringdur myn ha ka 23 tarik Jymmang 2025 kaba dei ka sngi shah pynïap u Raja Raghuvanshi.
Kat haduh mynta ki bor pulit jong ka Jylla ki dang pynlong ïa ka jingtohkit kaba bniah ban lap ïa ki jingshisha.
