Nongpoh, Jylliew 16
Uwei u rangbah briew uba dei na ka shnong Ummar jong ka thaiñ Western Ri Bhoi u la jah rngai kyndit hadien ba u la hiar na ka kali ban leit shabar ha ki bynta jong ka surok bah kaba dang hap ha ka shnong Umran ha Ri Bhoi District, mynta la san sngi kynthih.
Katkum ka tyllong khubor na ki bahaïing la ïathuh ba utei u rangbah u dei ba la tip kyrteng kum u Carlus Tron ba ju khot ieid u Jack, u la leit ban buh ïa la ka lok kaba armet sha Ganesh Das Hospital ha nongbah Shillong myn ha ka 11 tarik mynta u bnai Jylliew, 2025 bad ha kane kajuh ka sngi u la leit phai biang sha la shnong, kata sha Ummar.
La ïoh jingtip ruh ba namar ka jingkem ka miet bad ka jingbym ïoh kali shuh, utei u rangbah u la phone ïa u Bah Youngmind Makri, Secretary jong ka shnong Ummar na ka bynta ban phah wan shaw, hynrei namar ba utei u Secretary shnong ruh um lait dalade, u la phah noh da ki paralok ban leit shaw, haba utei u rangbah lem bad la ka kiaw kurim ki la ïoh ban wan phai.
La ïathuh ruh ba ynda poi ha ki bynta jong ka surok bah National Highway 6 kaba hap ha ka shnong Umran, utei u rangbah, u la phah sangeh ïa ka kali na ka bynta ban leit shabar, hynrei khlem wanphai shuh, wat hadien ka jingap slem kaba la pynlyngngoh ruh ïa kiba don lang hapoh katei ka kali kat haduh ba ki la hap ban mih bad leit wad ïa utei u rangbah ha katei jaka kaba u leit shabar.
Namar ka jingdum jong ka miet bad ka jingbym lapdien shuh ïa utei u rangbah, la pyntip noh mar mar ïa kane ka jingjia sha ki pulit ka thanat Umsning ha katei ka juh hi ka miet bad ha ka Lah Sngi U Blei, kata la kumba san sngi eiei ki paidbah nongshong shnong ki la mih shakhmat ban leit wad ïa utei u rangbah, hynrei ki khlem lapdien satia bad na ka liang ki bor pulit ruh ki dang ïaleh ban ban lapdien ïa utei u rangbah.
