Shillong, Jylliew 16
Ka Esaranaki Kharjana ka la khur da ka takma rupa, katba ka Daphishisha Shadap bad u Royal Jaden Laloo ki la ïoh da ki takma rnong ha ka jingleit ïashim bynta sha ka jingïalehkai karate ba la tip kum ka 4th KIO National Cadet – Junior & Sub-Junior Karate Championship 2025 kaba la long ha Dehradun, Uttarakhand naduh ka 12 haduh ka 15 tarik mynta u bnai.
Ha kane ka kynti, na ka liang ka All Meghalaya Karate Do Association (AMKA), ka la phah haduh 28 ngut ki khynnah ïalehkai, hapoh ka jingïalam u Bah Donboklang Lyngdoh, Bah Edwillbert K. Nongkynrih bad Kong Ester Mary Lyngdoh, hynrei tang kitei lai ngut ki la lah ban wanrah burom ïa ka Jylla.
Ka takma rupa kaba ka Esaranaki Kharjana ka la khur ka la wan ha ka kyrdan ïakhun jong ka -Junior Girls 13 years Individual Kumite, katba ka Daphishisha Shadap ka la ïoh ban khur ïa takma rnong na ka kyrdan ïakhun jong ka Junior Girls 48kg Individual Kumite, bad u Royal Jaden Laloo u la ïoh ban khur ïa ka takma rnong na ka kyrdan ïakhun jong ka Sub-Junior Boy’s 11 year 40kg Individual Kumite.
Halor kane ka jingjop, na ka liang ka AMKA ka la ai khublei ïa kitei lai ngut ki khynnah bad kumjuh ïa kiwei pat kiba la leit ban ïashim bynta sha katei ka rynsan ïakhun, namar jan baroh na ki nongïashim bynta kam pher wat la kim shym la ïoh ban kheit ïa u soh bathiang, pynban ki la pynpaw ïa ka mynsiem ïakhun pyrshah ïa kiwei pat ki nongïalehkai na kiwei pat ki jylla jong ka ri.
