Shillong, Jylliew 16
Ka Director General of Police (DGP) ka Meghalaya ka Kong Idashisha Nongrang ka la pynpaw ba ka long kaba eh ban pdiang ba kan dei tang ka jingdon ka jingshun kaba haduh katne halor ka jingshah pynïap jong u Raja Raghuvanshi.
Ka DGP ka la ong ba ki pulit ka Meghalaya kin dang tohkit shuh shuh ban lap ïa ki jingshisha nalor ka jingthmu kaba la paw hakhmat, kata ka jingieid lai dong ne ka ‘triangular love’ ban lap mano ba lamkhmat ïa ka jingshah pynïap jong u Raja, u kurim ka Sonam Raghuvanshi, kaba la kynnoh ba ka la suhbuit ha kane ka kam pynïap briew.
“Ngi dang peit bad tohkit ban ïohi hato dang don eiei shuh sha lyndet namar ka long shisha ka bym sngewlah ngeit ne kaba artatien ba tang hadien katto katne sngi jong ka jingïathoh shongkurim, ba ka mih ka jingshun kaba palat jong ka Sonam ïa u Raja u kurim jong ka, ka ban poi shaduh ka kam pyn-ïap,” la ong ka DGP haba kren sha ki nongthoh khubor ha ka Lah Sngi U Blei.
Shuh shuh katkum ka jingpynpaw jong ka Kong Nongrang, ki pulit kin sa khyllie lut ïa baroh ki bynta ban lap ïa ki jingshisha baroh halor kane ka jingshah pynïap jong u Raja Raghuvanshi.
Katba ki pulit kin ïaid bad ngam jylliew ha ka jingtohkit ban tip ïa ka tynrai halor ka jingthmu jong ka jingpynïap, kin ym leh klet pat ïa ki bynta kum ka kam halor ki jingdon jingem, ka jingïashun shimet nalor kiwei kiwei pat ki bynta.
Shuh shuh la ong ba ki pulit kin tohkit ruh ban kham ngam jylliew halor ar ngut ki briew kiba la leit ban buh ïa ka Sonam ha kawei ka jaka ïeng bos, kumba la ïathuh bad kam da kawei ka briew kaba la shong bos lang bad ka Sonam ha UP.
“Ngi la ïoh ka jingbit ban tohkit phra sngi ha along ki pulit, ka jingtohkit ka dang ïaid shakhmat. Ha ka jingtohkit dang ïaleh ban pynkhlaiñ ïa baroh ki sakhi ba don khnang ba ngin lah ban pynthikna ba ka jingtohkit ka long kaba paka bha bad ban lah ban don ïa ka mukotduma kaba khlaiñ. Ngi don bun ki sakhi bad ngi kyrmen ba ngin lah ban pyndep ïa ka jingtohkit bad pynkhreh ïa ka Chargesheeted ha ka por kaba biang,” la ong ka DGP.
Ha kawei pat ka liang, ka DGP ka la ïathuh ba halor ka jingshah kynnoh jong ka thaiñ Sohra, kam lah ban pdiang satia namar katkum ki jingkheiñ kiba don, ka thaiñ Sohra ka dei kaba duna bha ha ki kam sniew bad kumba long haba ïanujor na kiwei ki thanat hapoh ka jylla, ka thanat ha Sohra, ka dei kaba duna bha ka jingïoh ujor halor ki kam sniew.
