Shillong, Jylliew 16
Ka Meghalaya Veteran Table Tennis Association (MVTTA) ka la pynlong ïa ka lympung ïalehkai 7th Meghalaya Masters TT Team Championships ha ka sngi Saitjaiñ kum shi bynta ban rakhe ïa ka World Environment Day.
Ha kane ka lympung ïalehkai kaba la long ha Indoor Stadium kaba ha JNSC, Polo la wan shim bynta da ki nongïalehkai barim na kylleng ki district jong ka Jylla ba la phiah sha phra tylli ki kynhun ha ki ar tylli ki group. Kine ki kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ïa ka nam lahduh la rah da ka Save Trees ba la lamkhmat da u Sarwan Gareri kum u kapten. Kiwei pat ki nongïalehkai kane ka kynhun ki long u Ranjan Deb, Ridip Gogoi, Bah Michael Francis bad u Jayant P Rao.
Ïa ka nam Best Player of the Tournament la ïohpdiang da u Arup Nag na ka kynhun Save Fuel kaba na Tura. Ïa ki khusnam la sam da u Nababrata Bhattacharjee kum kongsan lem bad u B.L Narry, Secretary ka Meghalaya TT Associations kum symbud kongsan bad kiwei.
