Shillong, Jylliew 16
Ka synjuk ki nongñiah kali Tourist ka Jylla ïa kaba la tip kum ka All Khasi Meghalaya Tourist Taxi Association (AKMTTA) ha ka Sngi U Blei ka 15 tarik u Jylliew 2025 ka la ïoh ban bat ïa uwei u briew bym dei Khasi uba la aiwai be-aiñ ïa ki arshaka bad ki kali sha ki nongshang kai sha ka Jylla.
Haba ïakren bad u Bah Recaldinus Dohling lyngba ka phone ha ka Lah Sngi U Blei ka 16 tarik u Jylliew 2025, u la ïathuh ba ka kynhun jong ki ka la ïoh ban bat ïa uwei bar Jylla uba aiwai arshaka bad kali shimet beaiñ sha ki nongwan shangkai kiba na bar lyngba ka online.
U la ïathuh ruh ba ka seng ka la lap namar ba ki dkhot ka kynhun jong ki ki la buddien ïa ki nongwan kai namar ba ki la kyntait ban leit da ki kali Tourist bad hadien ba ki la buddien ki la lap ba u don uwei u bar jylla ba ai wai arshaka bad saw shaka ha pyrshah ka Hotel Marriot bad ki don haduh 15 ne 16 tylli eiei ban ai wai.
“Ka kynhun ki nongñiah kali tourist hynnin ka Sngi U Blei ki la leit ban kylli ïa ki nongwan kai sha ka jylla ban leit da ka kali jong ki hynrei hapdeng ka jingkylli jong ki ïa kita ki nongwan kai sha ka jylla ki la jubab da kaba ong, ba ki la dep ban ‘online’ da ka scooty, mar kumta ki dkhot jong ka AKMTTA ki la leit ban buddien ïa kita ki tourist bad ki shem ba hajan Marriot Hotel kaba don ka jaka ba ai wai ïa ki scooty bad ïa ki kali saw shaka,” la ong u Bah Recaldinus.
“Halor kane na ka liang ka kynhun jong ka All Khasi Meghalaya Tourist Taxi Association (AKMTTA) ka la ban jur ïa ka Sorkar Jylla ba dang ha kine ki khyndiat sngi ba la jia shah pynïap u Raja Raghuvanshi ha kaba ïadei bad ka jingaiwai ïa ki Scooty bad kane ka jingaiwai Scooty ka long beaiñ bad ka sorkar ka dei ban leh eiei halor kane,” la ong u Bah Recaldinus. Ka kynhun lyngba u Bah Recaldinus ka la pynrem jur ïa ki briew kiba aiwai ïa ki Scooty kumjuh ïa ki saw shaka (kali).
“Nangne shakhmat, ngim kwah shuh ba ki jingjia kum kine ki jingjia kin wan biang hapoh ka Jylla jong ngi bad ngim kwah hi ruh ba kino-kino ki ‘riew sniew kin ïoh ban shim kabu hapoh ka Jylla jong ngi,” la bynrap u Bah Recaldinus.
Haba ïadei pat bad ka jingïoh bat ka kynhun ïa utei nongaiwai scooty, u Bah Recaldinus u la ong, ba ka seng kam kwah ban aiti sha ka aiñ ïa utei u briew hynrei ka la shu maham ba um bit shuh ban dang aiwai Scooty ne kali nangne sha khmat.
Shuh-shuh u la kyntu ïa ka Sorkar Jylla ba ka dei ban leh kam kloi ban teh lakam ïa ki kali kiba wan nabar bad ruh ka seng ka la pynrem jur ïa kum kine ki briew kiba aiwai beaiñ.
