Jerusalem, Jylliew:
Kawei ka iingmala ba ju pyndonkam da ka kompeni Boeing hapoh ka nongbah Kyiv, ka la shah pynjulor jur ha ka jinghiar thma kaba jur jong ka Russia dang shen. La ong ba ki don 6 ngut kiba tip bha shaphang katei ka jingjia bad kiba la pynsaphriang ia ki dur ba la pynpaw da ki kot khubor jong katei ka ri.
Ka Russia, ka la hiar thma da ki liengsuiñ bad ki drone sha nongbah Kyiv jong ka Ukraine ha kaba sdang jong ka taiew ba la dep, da kaba pyndonkam ïa ki 315 tylli ki drone bad 6 tylli ki namding, ha kane ka sien hiar thma ba ka Russia ka la leit hiar thma ruh sha kiwei pat ki bynta jong katei ka ri.
La ong ba katei ka shlem treikam jong ka Boeing, ka long kawei na ki thong ba la leit thombor da ka Russia ha ka miet Sngi U Blei, katkum ka jingiathuh jong 2 ngut ki nongtrei jong katei ka kompeni Boeing, 3 ngut ki heh jong ka Ukraine bad uwei u heh jong ka American Chamber of Commerce ha Ukraine.
Wat hapdeng ka jingjulor jong ka jaka treikam katei ka tnat ha Kyiv, kam shym la don satia ka jingpynthut ïa ka jingtreikam, la ong u Andriy Koryagin, uba long u nongsynshar heh director jong ka Boeing ha Ukraine.
Uwei pat u nongrah ktien jong ka Boeing, u la kyntait ban kren eiei sha ki nongthoh khubor halor katei ka jingshah thombor, lait noh tang ban ong ba katei ka kompeni shna liengsuin jong ka U.S., ka buh hakhmat eh ia ka jingshngaiñ jong ki nongtrei jong ka, hynrei la ong ba ym shym la don uwei ruh ban mynsaw na katei ka jingjia ha katei ka sngi.
Ka Boeing ka la long ka nong ai kam ia palat 1000 ngut ki briew ha kylleng ka Ukraine.
Kumta la ong ba ki nongthoh khubor kim shym la lah ban pyntikna mardor ia katei ka jingjia namar ka Boeing bad ka American Chamber of Commerce kiba don ha Ukraine ruh kim shym la jubab mardor halor ka jingkylli jong ki nongthoh khubor ban ai jingkynthoh ne jingpynshai haba iadei bad katei ka jingjia.
