Shillong, Jylliew 16
Ki bor Pulit ka Jylla Meghalaya kin sa leit ban rah ïa ki 5 ngut kiba kynnoh donkti ban pyn-ïap ïa u Raja Raghuvanshi lashai ka sngi ka 17 tarik u Jylliew 2025 sha Weisawdong, Sohra na ka bynta ban pynwandur biang ïa ka kam sniew kaba ki la dep ban leh ne ka ‘Crime scene reconstruction’ ha ka por ba ki la pynïap ïa u Raja Raghuvanshi ha ka 23 tarik Jymmang, 2025.
Kitei 5 ngut ki kynthup ïa ka kurim u Raja, ka Sonam Raghuvanshi, u Raj Kushwaha, u Vishal Chauhan, u Akash Rajput bad u Anand Kurmi kiba la shah kem.
Ki bor pulit ka Jylla, ki la wan ïalam ïa ka Sonam Raghuvanshi na Gazipur, Uttar Pradesh sha thanat Sadar ha ka shiteng synñia jong ka 11 tarik u Jylliew, 2025. Katba ïa ki 4 ngut pat la wan ïalam sha thanat Sadar ha ka step jong ka 11 tarik ban pynlong ïa ka jingtohkit. Ha katei kajuh ka sngi la ïalam ïa baroh 5 ngut sha District & Session Court na ka bynta ban tian bishar.
Na ka liang ka Ïingbishar ka la ai jingbit ïa ki bor pulit ban tohkit 8 sngi ïa kitei 5 ngut bad tad haduh mynta ka sngi ka 16 tarik u Jylliew, ka la ïaid kumba 5 sngi eiei ka jingtohkit.
