Mairang, Jylliew 16
Kum shi bynta ban leh eiei halor ka sngi kyrpang jong kiba la san ha ka rta ïa kaba la tip kum ka World Elder Abuse Awareness Day, ka District Legal Services Authority (DLSA) West Khasi Hills District ha ka 16 tarik mynta u bnai ka la pynlong ïa ka jingbatai pynshai halor ki hok jong kiba la san ha ka rta ne ki tymmen ki kro ha ryngkat ka jingai jingsumar ei ha kaba ïadei bad ka koit ka khiah jong ki, ïa kaba la pynlong ha God’s Dream Old Age Home kaba don ha Kynshi Mawteijrong, Eastern West Khasi Hills District.
Ha kane ka sngi, ka Chief Judicial Magistrate cum DLSA Secretary Nongstoiñ, Kong DMKS Shadap ha ka jingkren jong ka, ka la batai halor ki skhim Sorkar kiba la mang kyrpang na ka bynta ki riewtymmen, ka la batai ruh halor ki hok jong ki, ba ki dei ban ïoh.
U Assistant Legal Aid Counsel, Bah C Kharsyntiew ha ka jingkren u la ong, ha kylleng ki ri ki don bun ki ‘riew tymmen kiba la shah leh bym dei bad shah ieh ha ki bahaïing bahasem khlem don nongpeit nongsumar ïa ki. Ha kaba ïadei bad kane u la pynshai ba ki don ki aiñ kiba teh ban pynïoh bad ïada ïa ki hok jong iwei-pa-iwei kiba la kot ka rta 60 snem shaneng.
Ha katei ka sngi hadien jong ka prokram ai jingpynshai, la pynbud pat sa da ka free medical check-up ne ka jingai jingsumar ei ha ryngkat ka jingsam ei ïa ki dawai dashin katkum ka jingbthah ki doctor hadien ba la dep ïa ka screening.
Kane ka prokram la pynlong da ka jingtrei mon sngewbha bad ka jingshimkhia jong ka DLSA bad ka Health department hapoh ka jingbtin lynti jong ka National Legal Service Authority.
