Shillong, Jylliew 16
Uwei u nongking lieng katba u dang ïalam ïa ki nongjngoh kai ha ka lieng kaba u ñiah, kyndit u la hap shapoh um bad ngam jyllop syndon.
Katkum ka khubor la ong ba kane ka jingngam jyllop jong utei u samla ka la jia ha ka Lah Sngi U Blei ha Wah Umngot, Dawki, West Jaiñtia Hills ha ka por kumba 2.20 eiei mynsngi katba u dang pynshong lieng ïa ki nongwan shang kai pyrthei.
Ïa une u nongking lieng ba la ngam jyllop la tip kyrteng kum u Amilson Surong na ka shnong Bakur.
Katkum ki tyllong khubor ba la ïoh lum la ong ba kane ka jinghap kyndit jong u Amilson shapoh um ka dei namar ba u la kem pang kynsan-kynsan namar u dei uba don ka jingpang khie-ring bad wat la u dei u samla uba tbit ban jngi hynrei namar ka jingpang u la ngam shapoh um.
Shuh shuh la ong ba ka kynhun ki pulit ha ryngkat bad ki pulit Fire & Emergency Service bad ki seng king lieng ka thaiñ, ki la pynlong ka jingïawad ïa une u nongking lieng bad la lap pat ïa ka met ha ka por 5:35 eiei janmiet.
