UK, Jylliew:
Katkum ki khubor, la ong ba palat 7,000 ngut ki samla pule ha ki skulbah ha kylleng ka ri Britain, la lap ba ki shu leh thok da kaba pyndonkam ïa ka ChatGPT bad kiwei kiwei ki lad jingïarap jong kane ka jingstad bathymmai ha ki snem pule 2023-24. Kum shi bynta ban tohkit, ki nongthoh khubor jong ka Britain ki la ioh ban leit iakynduh ia ki 155 tylli ki skulbah kiba hap hapoh ka aiñ Freedom of Information Act. Napdeng kitei, 131 tylli ki jaka pule ki la dep ban jubab haba iadei bad kane. Ki kaiphod ba la ioh lum, ki pyni ba ki don kumba 5.1 tylli kum kine ki jingjia ba la pyntikna ba ki khynnah pule jong kane ka juk ki shu pyndonkam tuh da ka AI na ka bynta ban pyndep ia ki jingthoh-jingtar bad wat ha ki eksamin jong ki ruh ba kin wad jingtip shaphang kiei- kiei kiba iadei bad ka jingpule jong ki nalor jong ka jingtip kaba ki la ioh na ki jaka pule bad kane ka jingdon kiba pyndonkam da kitei ki rukom jong ka ‘AI’, ka la kiew kumba 1.6 na man la ki 1,000 ngut ki nong pule ha u snem ba la dep.
Namar la ong ba ka jingshaniah jong ki paidbah ha ki rynsan AI kum ka ‘ChatGPT’, ka wanrah ia ka jingsyier bad ka pynpaw ruh ia ka jingeh kaba khraw na ka bynta ki jaka pule ha ki kyrdan kiba kham shalor. Wat la katta, la ong ba ka jingleh thok barim jong ki khynnah pule ka la hiar bha lada ianujor bad ka jingleh thok ki khynnah pule ha ki por ba mynshwa. Ha kaba, kane ka jingleh thok ki khynnah ka la hiar kumba 19 ngut na ka 1,000 ngut ki samla pule ha u snem 2019-20 sha ka 15.2 ngut ha u snem ba la dep bad kumta ruh la khmih lynti ba kan hiar shuh shuh sha ka 8.5 na ka 1,000 ngut ha kine ki snem.
Hynrei ki ‘riew shemphang pat ki la ong ba kine ki jinglap bad jingbuh jingkheiñ kim pat dei hok ki jingkheiñ ba pura bad lada wad bniah ia ka jingshisha lei ioh kan dang jur shuh-shuh ka jingleh thok lyngba jong ka AI.
Ki sakhi ki pyni ba ka jingpyndonkam bakla ia ka AI ka kham jyllei ban ia kaba la iathuh. Ka jingwad bniah ha u bnai Rymphang da ka Higher Education Policy Institute, la lap ba kumba 88% na ki samla pule ki pyndonkam ïa ka AI na ka bynta ki jingthew- jingwoh.
Namar la ong ba ki rynsan online ki pynsuk haduh katta ia ki khynnah pule lada ki nang ban pyndonkam ia ki. Ka kaiphod ka la lap da ki phew tylli ki video ha ka TikTok kiba pynphriang ïa ki tiar pynkylla ktien bad thoh essay jong ka AI kiba ïarap ïa ki samla pule ban ïaid lait ïa ki rukom wad bniah katkum ka rukom pule ba la ai jinghikai da ki jaka pule ba tikna.
U secretary jong ka saian bad teknoloji u Peter Kyle u la ong ha ka kotkhubor The Guardian ba dei ban pyndonkam ia ka AI ban kyntiew bad plie lad- plie lynti naka bynta ki khynnah kiba duna ha ka jingpule.
Ki kompeni heh jong ka Tech ki la dep ban thmu ia ki samla pule kum ki nongpyndonkam ba kongsan. Ka Google ka ai ïa ki samla pule ha ki skulbah ban pynthymmai khlem jingsiew ïa ki rukom treikam lyngba ka Gemini AI na ka bynta 15 bnai, katba ka OpenAI ka ai dor tad bha ïa ki samla pule ha US bad Canada ba kin pyndonkam ia katei ka rynsan pathai jingtip ba shyrkhei jong kane ka juk ba mynta.
