Shillong, Jylliew 16
Ki bor Pulit ka Jylla Meghalaya ki la pyllait paidbah ïa ka dur jong ka wait kaba la pyndonkam ban pyn-ïap ïa u Raja Raghuvanshi ha ka 23 tarik u Jymmang, 2025 ha Weisawdong ha Sohra ïa kaba la ïoh ban kurup da ki pulit.
Katkum ka khubor ba la pynmih da ka NDTV, la ïathuh na kine 5 ngut ki briew kiba la shah kynnoh ba ki la pynïap ïa u Raja Raghuvanshi bad pynlong ïa katei ka kam, la kynnoh ba u Vishal Chauhan u la thombor nyngkong ïa u Raja da ka wait.
Ka khubor ka la ïathuh ruh ba ïa katei ka wait la pyndonkam ban thombor ïa u Raja bunsien, bad la ïathuh ruh ba u Raja u la pyrshang ban pyllait im ïalade na ka jingshah thombor.
Ki pulit ki la lap ruh ba ha ka jingtohkit, utei u nongshah kynnoh u la thied ïa katei ka wait najan ka steshon rel jong ka Guwahati.
Kum ban shu kdew hangne, u Raja bad ka Sonam Raghuvanshi ki la wan poi sha Shillong ha ka 22 tarik u Jymmang na ka bynta ka Honeymoon jong ki bad ki la jah rngai noh ha ka 23 tarik u Jymmang 2025 ha Sohra bad la lap pat ïa ka metïap jong u Raja ha kawei ka kshaid kaba don hajan ka Weisawdong Falls ha ka 2 tarik Jylliew.
