Jowai, Jylliew 16
Ka Dorbar Shnong Mihmyntdu ha ka 13 tarik Jylliew, ka la pynkup burom ïa ki 86 ngut ki khynnah jong ka shnong kiba la trei shitom bad pass bha ha ka eksamin SSLC bad HSSLC jong u snem 2025 bad uwei u rangïalehkai uba la mihkhmat ïa ka jylla.
Ïa kane jingïalang pynkup burom la pynlong ha Community Hall Lumpyrtuh, Mihmyntdu ha ka jingdonlang u MLA ka Jowai Ma Wailadmiki Shylla kum kongsan bad Principal ka North Liberty Higher Secondary School Ma Richard Uriah kum symbud kongsan.
Ïa baroh kine ki khynnah, ka Dorbar Shnong Mihmyntdu ka la pynkhamti da ka syrnot sah jingkynmaw lem bad ka song pisa, lait noh u Sa-o-wan Sana uba la ïohpdiang ïa ka khusnam da ka laptop.
Nalor ki khynnah, ka dorbar shnong ka la sam khusnam ruh sha 5 tylli ki skul jong ka shnong Mihmyntdu kiba ïoh 100% ha ka result SSLC.
U Waheh shnong ka Mihmyntdu, Ma Abul Phawa ha ka jingkren lamphrang u la ong, kane ka jingpynkup burom ka dei sien kaba lai ba ka shnong Mihmyntdu ka la leh da ka jingthmu ban pynshlur ïa ki khynnah pule napoh ka shnong bad ruh ban ai mynsiem shuh shuh ïa ki khynnah kiba la ïohpdiang ïa ki khusnam ba kin nangtrei shitom bad minot khnang ban kiew kham shajrong ha ka jingpule ka jong ki.
U kongsan Ma Wailadmiki Shylla ha ka jingkren u la ai khublei ïa ka dorbar shnong, ki nonghikai, ki kmie ki kpa bad ïa ki khynnah pule kiba la wanrah ïa ka nam burom ïa ka shnong Mihmyntdu bad u la ong ba kane ka dei tang ka jingsdang jong ki khynnah pule ba kin nangkiew shakhmat.
Haba kyntu ban nangtrei shitom, u Ma Wailadmiki u la ai jingmut ïa ki khynnah pule ban long kiba tista ban pule bad kiba kloi ban wad ki lad lynti kumno ban pyllait ïalade na ki jingeh haba ki ïakynduh ha ka pule puthi khnang ba kin lah ban kyntiew ïa ka thaiñ, ka District bad ka jylla baroh kawei.
U la ban khia ruh halor ka jingroi stet jong ka jingstad teknoloji, da kaba ong ha kawei ka liang ka long ka jingkyrkhu bad ha kajuh ka por ka long ruh ka jingtim lada ym nang ban pyndonkam ïa ka. Namarkata kum ki khynnah haba pyndonkam ïa ka, pyndonkam da ka jingsngewthuh ym ban leit shabar u pud bad buh ïalade ha ka jingma.
U Ma Richard Uriah ha ka jingkren u la pynkynmaw ïa ki kyntien jong ki riewstad kiba ong, ym don mano mano ba lah ban ïakylliang bad ka jingtrei shitom. Ka jingjop kam wan tang ha ki kam bah ba la leh, hynrei ha kino kino ki kam kiba rit bad ban ïai pyrshang ruh nam ka sngi bad kata kan wallam sha ka jingjop ha ka jingim.
Haba kyntu ïa ki khynnah, u Ma Richard u la ong, wat peit ïa ka percentage kaba phi ïoh ha ka result kaba mynta, hynrei peit ïa ka ban dang wan shakhmat namar lada phi trei shitom nangne shakhmat phin ïoh palat ban ïa kaba phi ïoh mynta.
Ïa ka jingïalang la pynïaid da u Chairman Ma Kloi Lyngdoh, bad la ïoh ka jingkren pdiang na u Ialammi Lyngdoh Secretary SMC LSSM, kumjuh na u Ma Octomewot Lamin, bad ki jingkren lyngkot na ka arngut ki Toppers ka Mayanka Pde bad Sa-o-wan Sana bad ki jingkren khublei na u Secretary Shnong Ma Kner Phawa.
La pynphuh pynphieh shuh ïa ka jingialang pynkup burom da ka jingrwai bad shad bala shim bynta da ki samla ka shnong Mihmyntdu.
