Guwahati, Jylliew:
Kum shi bynta ban khanglad ïa ka jingsaphriang jong ka jingpang African Swine Fever (ASF), ka sorkar Assam ka la pyllait ïa ka kyndon treikam kaba pyrkhing ka Standard Operating Procedure (SOP) ka ban khanglad ïa ka jingshalan ïa ki sniang kiba dang im hapoh ka jylla bad lyngba ka jylla. Ki jingbthah, kiba la pynmih da ka Animal Husbandry and Veterinary Department, ki thmu ban ïada ïa ka jingbun ki sniang jong ka Assam bad ban ïada ïa ka jingim jong kito kiba shaniah ha ka kam ri jingri.
Katkum ka SOP, la khang ïa kano kano ka jingshalan ïa ki sniang kiba dang im mynta dei ban kyrshan da ki kot ki sla kiba biang, kynthup ïa ka bill thied kaba biang, ka GST Challan, ka E-way bill, bad ka syrnot ka koit ka khiah ba la ai da ka Laboratory ba la ithuh da ka sorkar India kaba pynthikna ba ki mrad ki lait na ka jingpang ASF. Nalor kata, uwei pa uwei u sniang u dei ban ïoh ïa ka jingpynshisha marwei marwei da u heh ophisar ka Veterinary, kaba pynshisha ïa ka jinglong, ka histori jong ka jingai tika, bad ka jingsdang na ki jaka ba lait na ka ASF. Kane ka syrnot kam dei ban long kaba rim palat ïa ka hynñiew sngi.
Ban pynthikna ïa ka jingbud ryntih, ïa ki kynhun peit bniah jong ka Veterinary yn sa buh ha ki Checkpoint ba hapoh ki jylla kum ha Srirampur (Kokrajhar), Boxirhat (Dhubri), Byrnihat (Kamrup Metro), bad Amguri (Sivasagar). Kine ki kynhun kin ym peit tang ïa ki kot ki sla hynrei kin peit ruh ïa ka met ne ka koit ka khiah jong ki mrad. Nalor kata, ym duna ïa ka 2% na ki sniang haman la ka jingkit yn pynlong ïa ka jingleh Test ASF kaba shu pyndonkam da ki tiar wad bniah kiba treikam stet. Lada lap ba uno uno u sniang u don ïa ka jingpang, ïa ka kynhun baroh kawei yn set kyrpang, yn test da kaba pyndonkam ïa ki rukom ba ïadei bad ka RT-PCR, bad yn pynkynriah khlem da siew bai lutksan ynda la pynthikna. Baroh ki jinglut kiba ïadei bad kane dei ban kit da u nongkit ne u nongkhaïi.
