Shillong, Jylliew 16
Ki pulit ka jylla ha ka Lah Sngi U Blei ki la rah ïa ka Sonam Raghuvanshi sha Meghalaya Institute of Mental Health Neuroscience Shillong (MIMHANS) ban leh ïa ka Medical Checkup.
Ïa ka Sonam kaba dang shah set ha Thanat Sardar la leit ïalam da ki pulit hapdeng ka jingpahara kaba jur.
Ki pulit ha kane ka sngi ki la pynher sted bha ïa ka Sonam mar shu mih na MIMHANS ban leit rah biang ïa ka sha Thanat Sadar. Ka jingleit rah ïa ka sha MIMHANS ka long ban phah peit bniah la ka don ne em ka jingduna ha ka bor pyrkhat pyrdaiñ.
Lah ban kdew hangne ba ka Sonam Raghuvanshi lem bad 4 ngut ki dang don hapdeng ka jingshah tohkit kaba phra sngi ha ki pulit ka jylla halor ka jingshah kynnoh ban pynïap ïa u Raja Raghuvanshi ha Sohra uba dei artad u kurim jong ka Sonam Raghuvanshi.
Ka jingshah pynïap u Raja Raghuvanshi ka dei ha ka 23 tarik u Jymmang, 2025 bad ki pulit ka Jylla ki la lap ïa ka met jong u Raja na arliang riat Weisawdong ha ka 02 tarik u Jylliew, 2025.
La ïathuh ruh ba ki pulit kin sa ïalam ïa ka Sonam Raghuvanshi lem bad 4 ngut kiwei sha Sohra lashai ka sngi ka 17 tarik Jylliew na ka bynta ban pynwandur biang ïa ka jingjia halor ka jingpynïap ïa u Raja.
