Shillong, Jylliew 16
Ki runar bym lah ban ithuh ki la ïoh ban tur ïa ki tiar ki tar kiba shongdor da ki phew hajar tyngka na ki thaiñ Lachumiere ha nongbah Shillong.
Katkum ka khubor na ki pulit la ong ba u Satyam Yadav u la ai ka jingujor ba ha ka 13 tarik mynta u bnai, ha ka por kumba 11.30 mynstep, ka kynhun ki briew na ka tnat ‘technical’ ka jong u, ki la lap ba ki runar bym lah ban ithuh ki la tuh ïa ki waiar, ki cable kiba shongdor kumba T.50,000/-na ka Smart City Project Pole kaba don ha Lachumiere, Shillong.
Ha kawei pat ka khubor na ki pulit, la ong ba u Kulbanstar Myrthong u la wan ban ai jingujor da ka ktien ba ha ka janmiet jong ka 13 tarik mynta u bnai, uwei u briew bym lah ban ithuh, u la shim ïa ka arshaka ka jong u, kaba don ïa u registration number AS05-E-8255 na Umshyrpi, Shillong, na ka bynta ban leit tes ne pyrshang da kaba leh mynleh ban thied ïa ka, hynrei une u briew um shym la wan phai shuh.
