Shillong, Jylliew 16
Kum shi bynta ban pynkhreh biang ïa ka jingïakob mareh ba la tip kum ka 4th Sohra International Half Marathon 2025, ki dkhot ka Organising Committee ki la shong jingïalang ha ka sien kaba nyngkong ha ka Lah Sngi U Blei ha Sohra.
Ïa kane ka jingïalang la pynïaid da u SDO ka Sohra, Bah Mark A. Challam (MCS) ha kaba ïadon lang ki ophisar na ki tnat bapher bapher jong ka Sorkar Jylla kata u Bah Païa War Nongbri, Assistant Director ka tnat ïalehkai, Bah Pynhun Syiem, SDPO, Kong Allya (MCS), kumjuh ki ophisar na ka tnat pule puthi, PHE, Tourism, PWD, Health, ki Sordar, Rangbah Shnong, ki nongmihkhmat na ki Dorbar Shnong bapher bapher.
Katkum ka kyrwoh ba la pyllait da u General Secretary ka Meghalaya State Olympic Association (MSOA) u Bah Finely Lad Pariat, la ong ba kane ka jingïalang ka long ban pynkhreh ïa katei ka jingïakob mareh kaba la thmu ban pynlong ha ka 27 tarik u Nailur mynta u snem da ka MSOA ha ryngkat ka Meghalaya Athletics Association (MAA) bad ka tnat ïalehkai jong ka Sorkar Jylla.
