Shillong, Jylliew 16
Ki pulit pynïaid kali ka distrik ki la ong ba ki la ïaid shakhmat bad ka jingtalasi ha kylleng ki jaka bad kin leh da kaba tyngeh lada lap ïa ki briew kiba ai wai be-aiñ ïa ki kali bad ki ar-shaka shimet.
“Hooid, ngi la ïoh pdiang ïa ka hukum, bad kum ka jingbud ryntih ïa ka hukum ba la pynmih da u Commissioner ka tnad Transport, ngi la bthah ïa baroh ki pulit pynïaid kali ban ïaid shakhmat bad ka jingtalasi bad lada lap ïano-ïano ha ka por ba talasi, ngin leh ïa kaba donkam katkum ka MV Act,” ong S.P. (Traffic) ka East Khasi Hills, u K. Prasad.
Haba kylli, u la ong ba haduh mynta, kane kan treikam shuwa ha East Khasi Hills, hynrei kumba ka long, kan treikam ha baroh kawei ka Jylla naba ïa ka hukum la pynmih da u Commissioner ka tnad Transport.
“Ngi la sdang ban talasi ïa ki kali kiba wan nabar bad hapoh sor kumjuh.
Ki don katto-katne ki jaka ha kaba ngi la buh ïa pulit ban talasi bad lada lap ïano-ïano kiba pynkheiñ ïa ki kyndon katkum ka Section 192 A bad 207 jong ka MV Act, ngin pynshitom da kaba tyngeh,” ong u Prasad.
Haba kylli, u la ong, “Ki ‘Rapido’ ki bym pat pynrung kyrteng hapoh ka tnad Transport, ma ki ruh kin hap hapoh ha jingkhmih jong kane ka aiñ.”
Haba phai sha EKH, u la ïathuh ba ha baroh 7 tylli ki jaka ba don ki shnat treikam jong ki pulit pynïaid kali, la bthah ban pynlong ïa ka jingtalasi ïoh don mano-mano kiba ai wai ne buhrieh ïa ki kali ne ‘Scooty’ shimet khlem da ïoh ïa ka jingbit ne jingpynrung kyrteng – da kaba ban biang ba ki pulit kin sa pynshitom bad leh ïa kaba donkam.
Shuh shuh haba jubab, u la bynrap, “La pynïeng ïa ki ‘Naka’ bad ki pulit ki la ap pahara ha ki ‘View Point’, Mawlai, Lad MES ban pynlong ïa ka jingtalasi. Lada don kano-kano ka jingujor, ngin leh ïa kaba donkam. Ngi la bthah ïa ki Tourist Taxi Association, don ruh ki ‘riew shimet kiba ju pyntip sha ngi bad haba ngi ïoh jingtip, ngin leh ïa kaba donkam.”
Kum ban shu kdew hangne, ka tnad Transport ka la pynmih ïa ka jingpynbna paidbah kaba khang pyrshah ïa ka jingai wai ïa ki kali ar shaka bad saw shaka jong ki ‘riew shimet ba khlem ka jingbit.
Kane ka jingpynbna ka la wan hadien ka jingtohkit jong ki pulit halor ka jingshah pynïap jong u nongjngoh kai pyrthei na Indore, u Raja Raghuvanshi, ha kaba la pynpaw ba ma u ryngkat ka kurim (jong u), ka Sonam Raghuvanshi lem bad ki lai ngut kiba la shah kynnoh donkti ban pynïap ïa u Raja, ki la wai ïa ki ar shaka na Shillong ban leit sha Sohra bad ban leh ïa kane ka kam runar.
