Shillong, Jylliew 17
Ki pulit ka East Khasi Hills District hapoh ka jingïalam u Bah Vivek Syiem kum Superintendent of Police, ki la shimpor haduh ar kynta shiteng eiei ba kin don ha jaka ïeng kali ha Weisawdong na bynta ban phah pyni biang ïa ka Sonam Raghuvanshi bad lai ngut ki shynrang kumno ki la pynïaid shakhmat ïa ka kam ban pynïap ïa u Raja Raghuvanshi.
Ki pulit ki la poi sha Weisawdong ha ka por 11:40 baje mynstep jong ka 17 tarik mynta u bnai jylliew bad ki la hiar beit beit sha Mawlakhiat ban phah batai ïa ka jaka ba ki pyni ïa ki scooty jong ki, kaba la jia ha ka 23 tarik Jymmang 2025.
Ki pulit ki la phah shong la ka jong ka kali baroh saw ngut namar ki hap ban ker khnang ban ym ailad ïa ki nongthoh khubor ba kin ïoh ring video.
Ïa ka Sonam Raghuvanshi la synran da ki pulit kynthei katba ïa u Vikash, Anand, Vishal la synran da ki pulit shynrang.
Ha ka por ba ki pulit ki la wan ïalam ïa ka Sonam sha Weisawdong, ki nongthoh khubor ki la kthong beit ban ïoh shondur ïa ka Sonam kaba dei kaba hakhmat kaba la kynnoh ban ïalam ïa kane ka kynhun jong kine lai ngut ki shynrang ban pynïap ïa u Raja Raghuvanshi uba dei u kurim lajong.
Haba ki pulit ki la poi ha ka por 2:00 baje nohphai sngi ha Weisawdong u slap u la ther tyngeh bad hadien ba kine saw ngut ki la dep batai lut ïa ki pulit ki la mih noh na Weisawdong ha ka por 4:30 janmiet.
Na Weisawdong ki pulit ki la ïalam sha Mawkma kaba la bret ïa ka jaket kup slap bad pynkut ban phah batai sha jaka ïeng ka scooty ha Sohrarim.
