Nongpoh, Jylliew 17
La hynriew sngi lynter hadien ba uwei u rangbah na ka shnong Ummar u la jah syndet ha ki bynta jong ka rud surok bah National Highway 6 ha ki thaiñ Umran katba u dang leit shabar, na ka liang ki pulit ka thanat Umsning ha ryngkat ki paidbah nongshong shnong, ki dang ïai pynlong ïa ka jingwad ban lap ïa u haduh mynta ka sngi ruh, hynrei ki khlem lapdien satia.
Kum ban shu kdew utei u rangbah uba la tip kyrteng kum u Carlus Tron bad uba ju khot ieid ha shnong kum u Jack, u la jah rngai kyndit naduh ka 11 tarik mynta u bnai Jylliew, 2025 hadien ka jingwan buh ïa ka lok kaba armet ha Ganesh Das Hospital, Shillong.
Ka jingjahrngai syndet jong utei u rangbah ka la pynlyngngoh shi kat dei ïa ki nongshong shnong jong ka Ummar, khamtam ki bahaïing bahasem kiba dang ap khmih lynti ba un wanphai noh sha la ïing bad dang khmih lynti ban lap noh ïa u katba ka jingwad ruh kan dang ïai bteng ha kine ki sngi ki ban sa wan.
