Shillong, Jylliew 17
Kum shi bynta ban lah ban tehlakam ïa ki kam sniew, ka Sorkar Jylla ka la bthah ïa ka Sohra Tourism Association (STA) ba kin ai jingkheiñ noh halor ki jaka ba la ithuh kiba kham don jingma ban ïoh pyndait noh da ki kor Close Circuit Television (CCTV).
Haba kren sha ki lad pathai khubor ha ka Sngi Ba-ar, u Myntri ka tnat ki kam jngohkai pyrthei ka jylla u Bah Paul Lyngdoh u la ong, ba ka tnat ka la bthah ïa ka STA ba kan aiti ïa ka thup kyrteng jong ki jaka jngohkai bad ki jaka ba i donkam, kiba i kop ba lah ban mih kino-kino ki jingjia, ban pyndait noh ïa ki kor CCTV.
U Bah Paul u la ong, hadien ba la aiti ïa ka thup kyrteng, na ka liang jong ka Sorkar lyngba ka tnat kan sa sdang noh mardor ban leh ïa ka kam ban pyndait ïa ki kor CCTV.
U Bah Paul u la ong ba ki jaka ki ban pyndait ïa ki kor CCTV kin dei ki jaka kiba wan ïuhkjat bun eh ki nongshangkai kum ha Pung Umiam, Nan Polok, Sohra, Dawki bad kiwei kiwei.
U Myntri u la pynbna ruh ba ka Sorkar Jylla kan sa thied thymmai biang ïa ki kali PRIME hapoh u bnai Naitung, ki ban kit ban rong ïa ki nongwan shangkai pyrthei kiba wan sha Jylla.
“Kin don kumba 50 tylli ki kali bad ngin sa ïaid katkum ka lynti kaba dei ban khot ïa ki nongsengkam kiba kwah ban ïoh ïa kane ka skhim,” u la ong.
Haba kylli halor ka jingshngaiñ ki nongwan shangkai pyrthei, u Myntri u la ïathuh ba ka Sorkar kala rai ban pyntreikam ïa ki sienjam bapher bapher ban pynthikna ïa ka jingshngaiñ bad jingïada ïa baroh ki nongwan shangkai pyrthei kiba wan ïuhkjat ha Jylla.
Kine ki kynthup ïa ka jinghap pynrung kyrteng khlem pep ïa ki nongwan shangkai, ka jingpyndait ïa ki kor CCTV ha ki jaka jngohkai ba don bun eh ki nongwan shangkai bad kiwei kiwei.
U la ong ba baroh ki ïing basa kin hap ban pynrung kyrteng mynta ïa ki briew kiba wan sah lyngba ka Tourism App, kaba la don lypa, kaba mynta la pyndonkam tang kumba 60% da ki ïing basa.
U Myntri u la ong, “Kaba kham kongsan eh ka dei ka rai bala shim da ka Kynhun Myntri ban pynkhlaiñ biang ïa ka MRSSA bad ban nang ai bniat shuh shuh, ka ban ïarap ïa ngi ban tehlakam ïa ki kam bymman.”
