New Delhi, Jylliew:
U Myntri Rangbah-duh ka ri India, u Narendra Modi, u la ai sngewbha ia ka Carpet Silk ba la thaiñ hi da ki nong Kashmir, sha u President ka Cyprus, u Nikos Christodoulides bad kumjuh ruh kawei ka pla thep pisa ‘Purse’ kaba la shna na Andhra Pradesh ha ka por ba u leit jngoh ia katei ka Ri.
Kane ka jingai sngewbha jong u Modi da kine ki tiar, ka long ban pyni ia ki riti dustur kiba riewspah bad kiba pher jong ka India sha ki riew pawkhmat ba shabar jong ka ri.
Ki heh sorkar ki la ong ba katei ka ‘Silk Carpet’ ba la thaiñ da ka kti, ka dei ka jingthaiñ kaba itynnad haduh katta jong ka kolshor bad ka pateng jong ka ri India, kaba la thaiñ da ki nongsuh- nongthaiñ bad ki nong pynwandur kiba tbit ha ka them Kashmir da kaba pyndonkam da ki buit shna kti kiba la rim da ki spah snem.
Ia katei ka carpet la thaiñ na ki ksai ‘Silk’ kiba khuid bad la rong da ki rong ba tynrai, kine ki carpet ki don ïa ki jingshna kiba jylliew bha kiba la pynshong nongrim na ka jingitynnad jong ka mariang jong ka thaiñ, ki pung, ki dieng Chinar bad ki syntiew ba iphuh- iphieng.
Ia ka pla tyngka rupa pat kaba pyniasoh lang ia ki kynja nar barim bad ka rukom pynwandur ba mynta, la shna da kaba pynwandur bha da ka rukom ‘Repousse’ kaba don ia ki dur syntiew kiba la pynshong nongrim na ki jakamane bad ki dur syiem.
Ki heh sorkar ki la ong ruh ba u maw kordor ba shiteng hapdeng jong katei ka pla, u pyndap ia ka jingitynnad bad ka dur kaba pyni shongkhia bha ia katei ka pla bad ki tduh ba la pynitynnad bad pynwandur bha ki pynwan ia ka sha ka dur kaba i-shongkhia bad i-shongdor haduh katta.
