Nongpoh, Jylliew 17
Ka Khasi Students Union (KSU) Umsning Circle ha ka Sngi Ba-ar ka la ïoh ban pyllait paidbah ïa ka kali kit nongpang (ambulance) ban shakri ïa ki paidbah ka thaiñ Umsning bad ruh kum shi bynta ban rakhe ïa ka lyngkhuh sngi ïap ba 38 snem jong u samla Biswal Paul Makri (bam kwai ha dwar u blei) uba la pha ïa la ka jingim ban ïakhun pyrshah ïa ka jingthombor ki jaidbynriew Nepali ha ka snem 1987.
Ïa katei ka kali kit nongpang, la pyllait paidbah da u samla Donald V Thabah, General Secretary ka KSU Sengkmie ha ka jingdon ryngkat u samla Ferdynald Kharkamni, President ka KSU NKHD, u Bah Rocky Kylla, Chairman ka Umsning Town Dorbar, u Bah Rocky A Marweiñ, Bah Donkupar Sumer, samla Lester Nongbet, President ka KSU Umsning Circle nalor kiwei kiwei ki nongïalam, dkhot ka seng bad ki nongshah khot sngewbha.
Kum ban shu kdew, ka KSU Umsning Circle ka la lah ban thied ïa kane ka kali kit nongpang lyngba ka jingpynlong ïa ki prokram pynmih pisa bapher bapher kum ka jingïalehkai phutbol, ka fete, housie bad kiwei kiwei de lyngba ka jingtrei shitom bad shitrhem jong baroh ki dkhot ka seng.
Ha kane ka sngi, la ïoh ruh ïa ka jingkren na u Bah Rocky Kylla, u samla Ferdynald Kharkamni, bad u samla Donald V Thabah kiba la ai ka jingïaroh sha ki nongïalam bad dkhot jong ka KSU Umsning Circle kiba la lah ban thied ïa kane ka kali kit nongpang ban ai ka jingshakri kaba paka sha ki paidbah ka thaiñ Umsning, kyrpang na ka bynta kito ki longïing kiba kham duna ha ka ïoh ka kot.
U samla Donald u la ïathuh ruh ïa ka khana lyngkot kaba pynpar ‘ñiangkhriat halor ka jinglenlade bad ka jingpha jong u dkhot ka KSU, u samla Biswal Paul Makri uba dei na ka shnong Umrit, Ri Bhoi District, uba la shah siat ïap ha ki ktang suloi jong ki pulit CRPF ha Motphran ha ka jingïakhih Anti-Foreigners Movement ha ka 17 tarik u Jylliew ka snem 1987.
U samla Paul Biswal Makri, u dei uwei na ki dkhot ka KSU hapoh ka jingïalam jong u Bah Bull N Lyngdoh (bam kwai ha dwar u blei) ban ïakhun pyrshah ïa ka jingthombor ki jaidbynriew Nepali kiba la sdang ban knieh ïa ki jaka puta jong ki trai ri bad leh be-ijot ruh ïa ki kynthei Khasi ha kato ka por.
La ïathuh ruh ba ha ka 15 bad 16 tarik jong u bnai Jylliew ha utei u snem 1987, ka la don ka jingsynreit kuli pathar da ki pulit CRPF ïa ki dkhot ka KSU bad ki paidbah ha kylleng ka sor Shillong kaba la wanrah ruh ïa ka jingmynsaw jong kiba bun ngut. Hynrei wat hapdeng kitei ki jingjia, ki dkhot ka seng ki ïeng triang ha la ka nongrim ryngkat ka jingkyrshan ba radbah ki paidbah bad bteng biang ïa ka jingïakhun ha ka sngi kaba bud, kata ka 17 tarik u Jylliew, 1987.
Dei ha ka 17 tarik ba u samla Paul Biswal lem bad uwei u rangbah na Smit ki la duh noh ïa la ka jingim ha ki kuli jong ki pulit CRPF kiba la siat naphang bad wanrah ruh ïa ka jingmynsaw jong kiba bun ki ‘riew paidbah. Ha kane ka jingjia, la ïathuh ba u samla Paul Biswal Makri u la shah siat bun kuli haduh ba ki bynta jong ka khlieh ka la pra phum, katba u rangbah na Smit, u bym don bynta satia bad ka jingïakhih bad uba trei kum u daju, u la shah tied shah bom bad shah pynïap dusmon ha ki pulit CRPF.
U samla Donald u la pynpaw ruh ba dei lyngba ka jinglen lade jong une u samla na ka them Ri Bhoi kaba la wanrah ïa ka jingïatylli kum ka jaidbynriew ban ïakhun bad pynher krad ïa ki mynder, lym kumta la kylla long rit paid ha la ka jong ka ri bad ka Ri Bhoi ruh ka la kylla Gurkha Land.
Kum shibynta jong ka jingkynmaw burom ïa utei u ‘riewshlur na ka liang u samla Ferdynald Kharkamni u la pynpaw ba ka seng kan sa pynïeng ïa u mot jong u samla Biswal Paul Makri ha ki bynta jong ka sor Nongpoh ha ki khyndiat por ki ban sa wan.
