Shillong, Jylliew 17
Ki bor District ka East Khasi Hills ha ka jingdon lang ki ophisar jong ka tnat PHE, Traffic Police, NHIDCL bad ki nongïalam ka Synjuk Nongsynshar Shnong Upper Shillong (SNSUP) ha ka 17 tarik u Jylliew 2025 ki la pynlong ka jingjurip ïa ka surok naduh na jingkieng Umshyrpi ter ter shaduh 3 Mer.
Kane ka jingleit jurip ïa katei ka surok kadei hadien ba na ka liang ka Synjuk Nongsynshar Shnong Upper Shillong (SNSUP) ka la ujor sha ka Deputy Commissioner (DC) ka East Khasi Hills ka Kong Rosetta Mary Kurbah halor ka jingsuki palat ban pyntrei ïa ka surok 4 Lane kaba la wanrah ïa ka dheng kali kaba jur bha ha ka thaiñ.
Ha ka jingïakren bad ki lad pathai khubor, na ka liang u Adviser ka Synjuk Nongsynshar Shnong Upper Shillong, Bah Daniel Thangkhiew, u la pyntip ba ha ka jingjurip ki la pynpaw ha ki heh ka NHIDCL ïa ka jingsuki ka jingtrei bad ruh ïa kiba bun ki mat kiba la ktah pat ïa ka leit ka wan jong ki paidbah.
U Bah Daniel u la ïathuh ba ha ka jingïakren bad ki Ophisar jong ka NHIDCL, ka synjuk ka la kyntu ban pynsted ïa ki kam ban pyndep ïa ka surok namar ka jingslem ban shna ïa kane ka surok ka la wanrah ïa ka dheng kali kaba jur ha kane ka thaiñ.
U la ong ruh ba ka synjuk ka la pynpaw ha ka NHIDCL ba ki shnong ki long kiba la kloi ban ïatreilang khnang ban pynsted ïa ki kam namar kane ka surok kam dei tang ïa ki paidbah jong ka thaiñ Upper Shillong, hynrei wat ïa ka thaiñ West Khasi Hills, South West Khasi Hills, Sohra, Pynursla bad ka thaiñ Garo Hills.
“Ngi la dep ban pynpaw ba ka jingpyntrei ka suki palat bad na ka liang jong ki heh ka NHIDCL ruh ki kubur ïa kata. Kumta ngi la kyntu ba kin pynstet namar kane ka dei ka surok bah bad ka la mih ruh ka dheng kali kaba jur bha tang na ka bynta kane” la ong u Bah Daniel.
Haba bynrap kren pat na ka liang u BDO ka Mylliem Block, Bah Toshanbha Marweiñ, u la kubur ba ka jingpyntrei ïa kane ka surok ka long kaba suki bha kaba la ktah ïa ka ïaid ka ïeng jong ki paidbah baroh.
Na ka liang ka synjuk ka la pynpaw ba ki long kiba kloi ban ai ka jingïatreilang bad ka kompeni ba pyntrei na ka bynta ka jingïaid beit bad ïaid stet ka kam khnang ba ki paidbah kin ym mad shuh ïa ka jingsahkut blok da ki kynta.
