Shillong, Jylliew 17
U Superintendent of Police ka East Khasi Hills District, Bah Vivek Syiem, u la ïathuh ba ka Sonam Raghuvanshi kaba dei ka kurim jong u Raja Raghuvanshi ka la phet noh hadien ba u Raja u la lynñiar haba u la shah bom nyngkong ha u Vishal bad bud ka jingshah bom sa ha u Akash bad u Anand.
Haba ïakren bad ki nongthoh khubor hadien ba kine ki saw ngut ki la wan batai biang ïa kaei kaba ki la dep pynïap ïa u Raja Raghuvanshi myn ha ka 23 tarik Jymmang, u Bah Vivek u la ïathuh ba hadien ba ki la dep pynïap kine lai ngut ki la bret ïa u Raja shapoh riat.
U la ïathuh kine saw ngut ki la pynkhreh ban pynïap ïa u Raja naduh Nongriat, Mawlakhiat hynrei kim ïoh lad, kumta haba ki poi ha jaka ïeng kali ha Weisawdong ki lap ba kham kynjah.
“Haba ki la hiar kham sharum kaba dei ka ‘view point’, ka Sonam ka la ïeng hakhmat u Raja, u Anand u ïeng sha kadiang, kham shadien u ïeng u Akash, sha kamon u ïeng u Vishal,” u la ong.
U la ïathuh ba dei u Vishal uba bom nyngkong ïa u Raja, bud sa u Anand tangba u khlem ïoh bha hynrei wan sa u Akash uba la bom haduh ban da khlad bad hangne hi ki la bret sha riat.
Shuh shuh u la ïathuh ba kato ka sopti lieh kaba khah snam dei u Akash uba bret sha riat.
U la pyntip ba mynta ka sngi ki SRDF ruh ki la ïoh ban hiar biang sha riat bad lap sa kawei ka wait kaba kine ki la pyndonkam.
U Bah Vivek u la pyntip ba ka Special Investigation Team kan dang bteng ban tohkit ïa kine ki saw ngut kynthup ïa u Raj Kushwaha.
“Hadien ba ki la dep pynïap ïa u Raja, ka Sonam ka la pynpait ïa ka mobile jong u Raja katba ka Sonam kaba don lai tylli ki mobile ka la bret noh ar tylli bad bat tang kawei ban ïoh ïa phone bad u Raj,” u la ïathuh.
U la ïathuh biang sa kawei ka kynhun na pulit Meghalaya ki la leit mynhynnin ka sngi ban leit tohkit ïa ka jaka sah ka Sonam tangba kim shym la lap eiei shuh.
Kum ban shu kdew, ki pulit ki la poi ha ka por 2:00 baje nohphai sngi ha Weisawdong ha kaba u slap u la ther tyngeh bad hadien ba kine saw ngut ki la dep batai lut ki pulit ki la mih noh na Weisawdong ha ka por 4:30 janmiet.
Na Weisawdong ki pulit ki la ïalam sha Mawkma kaba la bret ïa ka jaket kup slap bad pynkut ban phah batai sha jaka ïeng ka scooty ha Sohrarim.
