Gaza, Jyllliew:
Ka tnat iada paidbah jong ka Gaza, ka la iathuh ba ki shipai ka Israel, ki la pyniap dusmon ia ka jingim jong 20 ngut ki riew paidbah, kiba dang ap laiñ ban leit shim mar bam ha ka sngi Nyngkong ha katei ka jingjia kaba shyrkhei kaba hadien duh jong ka jingleit thombor ka Israel sha nongbah Gaza, hajan ka jaka ai jingïarap kaba hap hapoh ka jingkhmih jong ka US, kaba don ha ka thaiñ Shatei jong ka Palestine.
U nongaiktien jong ka tnat ïada ri paidbah, u Mahmud Bassal, u la ïathuh ha ki nongthoh khubor ba ki shipai (Israel) ki la leit thombor shajan ka jaka sawdong jong ka Al-Alam kaba don hapoh jong ka nongbah Rafah kaba sha ka phang Shathie jong ka nongbah Gaza, ha kaba kiba bun ki paidbah ki dang ap laiñ ban leit shim ia ki lad jingïarap na ki jaka sam bam.
U Bassal u la iathuh ba ha katei ka sngi, 20 ngut ki riew paidbah ki la duh ei ia ka jingim ha katei ka jingleit thombor ba kynsan jong ka Israel sha katei ka bynta bad kumba 200 ngut kiwei pat ki la mynsaw na katei ka jingjia ha katei ka sngi.
Ha kaba sdang jong u bnai Lber, ka Israel ka la pynjari ïa ka jingkhang ïarap ba pura ha ka Gaza Strip hapdeng ka jingbym lah ban ïakren ban ïasuk, hynrei ka la pynjem noh tang shi bynta na kitei ki jingkhang ha kaba kut jong u bnai Jymmang.
Ka International Committee jong ka Red Cross (ICRC), ka iathuh ba ka la pynkit ia baroh ki 200 ngut ki briew, ha ka jaka sumar jongka, kaba don ha ka thaiñ Al-Mawasi, kaba don hajan ka nongbah Rafah.
Ki kynhun jong ka Red Cross ki la sumar ruh ïa ki 170 ngut ki nongpang ha katei ka hospital ha ka Sngi U Blei, “bun na ki, ki la mynsaw jur na ki jingshah siat suloi bad kiba dang ia pyrshang shitom ban ioh rung sha ka jaka sam jingbam”.
Ka Israel ka la mad ïa ka jingpynbor kaba jur bha na ki ri ka pyrthei ban sangeh noh ia ka jingleit thombor sha Gaza bad ban pyrkhat lem naka bynta ka jinglong- jingman jong ka longbriew- manbriew ha Gaza.
