Agartala, Jylliew:
Ka kynhun na ka Seng Tipra Motha Party ka la kyntu ïa u Myntri Rangbahduh ka ri u Narendra Modi ban thaw ïa ka kynhun treikam ba kyrpang na ka bynta ban ithuh bad pynkynriah noh ïa ki nongwan buhai shnong be-aiñ kiba sah ha Tripura.
Kane ka kynhun kaba don 15 ngut ki dkhot ba kynthup ïa ki Myntri, ki MLA, ki dkhot treikam ka TTAADC, bad ki MDC ki la aiti ïa ka shithi sha u Lat ka Tripura u Indrasena Reddy Nallu kaba la thoh sha u Myntri Rangbahduh ka ri.
U Myntri ba dei khmih ïa ka tnat khlaw bad u heh jong ka Tipra Motha u Animesh Debbarma u la ong ba ka sorkar pdeng ka la bthah ïa ki katto katne ki jylla ban shim khia ban leh ei ei ha kaba ïadei bad ka jingwan buhai shnong beaiñ, da kaba kdew ïa ka Assam, Gujarat, bad Meghalaya kum ki nuksa ha kaba kum kine ki jingpyntreikam ki dang ïaid shakhmat.
“Hynrei ha Tripura, kam shym la don satia kano kano ka jingleh kaba lah ban ïohi. Ngi kwah ïa ka jingpeitngor jong ka sorkar pdeng ban pynthikna ïa ka jingpyntreikam hangne ruh”, u la ong.
U Debbarma u la tyrwa ba dei ban thaw ïa ka kynhun treikam, kaba kynthup lang ïa baroh ar ki pulit ka Tripura bad ki shipai ka sorkar pdeng, ban peit ïa kane ka kam.
U la pynpaw ruh ïa ki jingsngewkhia halor ka jingkylla ha ka jingbun briew ha Tripura namar ka jingwan buhai shnong kaba ju jia man ka por, khamtam ha ka por bad hadien ka jingïapait jong ka ri Bangladesh ha u snem 1947 bad ka thma pynlaitluid ïa ka ri Bangladesh ha u snem 1971. “Ki briew kiba wan shwa u snem 1971 la ithuh kum ki nongshong shnong ba dei hok.
Hynrei kat kum ka jingïateh jong ka Indira bad u Mujib, ïa kito kiba ïaid lait ïa u pud hadien dei ban kheiñ ïa ki kum ki nongwei. Ka la dei ka por ba ïa kane ka jingïateh kular dei ban pyntreikam khia bha,” u la ong.
