Shillong, Jylliew 17
Halor ka jingkhlad noh jong ka longkmie kaba dang armet ryngkat bad i khun hapoh kpoh ha ka 4 tarik u Jylliew 2025 ha Maternal and Child Health (MCH) Jowai, West Jaiñtia Hills District, ka Dr. Ampareen Lyngdoh ka la pynpaw ïa ka jingsngewsih bad sngewkthang mynsiem halor kane ka jingjia ïa katei ka longkmie.
Ha ka jingïakren bad ki lad pathai khubor ha ka Sngi Ba-ar ka 17 tarik u Jylliew 2025, ka Dr. Ampareen ka la pyntip ruh ba ki bahaïing bahasem jong katei ka longkmie kaba la khad noh ki la leit ban ujor sha ka ïingbishar ka Jylla ha kaba ka Meghalaya Human Right Commission (MHRC) ruh ka la pynlong ïa ka tohkit halor kane.
Katei ka longkmie kaba la khlad noh ka dei ka Kong Pynche Bareh, 37 snem ka rta, na ka shnong Jalaphet, East Jaiñtia Hills District. Ha ka 2 tarik u Jylliew 2025 kane ka longkmie ka la shah sumar ha katei ka hospital ban ïoh ïa ka jingsumar kaba paka hynrei ha ka 4 tarik Jylliew 2025 kane ka longkmie ka la khlad noh. Kumta na ka liang ki bahaïing jong kane ka longkmie ki la kynnoh ba ka dei ka jingbym shimkhia ki doktor namar kane ka longkmie ka la tlot khlem ïoh bam eiei.
Ka Dr. Ampareen Lyngdoh ka la ong ba halor kane ka jingjia ïa katei ka longkmie ngin ym lah ban shu ïa khana tang ha ki social media, da kaba ka la pynpaw ïa ka jingsngewsih ba kum kane ka jingjia ka wan jia bad ngin hap ban peit ba kum kine ki jingjia kin ym wan jia ha ka Jylla.
“Mano ba bakla bad haei ka bakla ngam kwah ban khana namar ba yn sa ïathir ynda la poi ha ka jingbishar,” la ong ka Dr. Ampareen.
Nalor kane, ka la ong ruh ba kum ka tnat jong ka sorkar ngim dei ban shah ïa kum kane ka jingjia ban wan jia.
Mynta ïa kane ka ‘case’ ngin sa peit kumno ka wan ka jingbishar bad na ka liang ka tnad ka koit ka khiah lyngba ka Dr. Ampareen ka la ong ba lada don kano-kano ka jingbakla na ka koit ka khiah halor ka jingïap katei ka longkmie ba armet ngin sa pynshitom.
Shuh shuh ka la ïathuh ba na ka laing ka koit ka khiah ruh ka la thaw da ka komiti ban tohkit halor kane ka jingjia.
