Nongpoh, Jylliew 17
Ka lympung ïalehkai phutbol District Level Inter School Subroto Cup 2025 ba la pynïaid da ka shlem treikam u District Sports Officer (DSO) ka Ri Bhoi District ka la poi sha kaba kut ha ka Sngi Ba-ar. Ka Nongjri Presby-terian Secondary School ka la long ka lahduh ha ka Under-17 kynthei bad shynrang lem bad ka Mawtneng Upper Primary & Secondary School ha ka Under-15 shynrang.
Ha ka jingïakhun phai-nal Under-17 kynthei kaba la long ha madan ïalehkai jong ka shnong Umdihar, ka Nongjri Presbyterian ka la lah ban pynliem noh ïa ka Christian Higher Secondary School da 1-0 kol. Kane ka la wan urlong lyngba ka shi kol ba la thep da ka Remika Khongkai ha ka minit kaba 53.
Ka Nongjri Presbyte-rian, sa shisien ka la long biang ka lahduh ha ka Under-17 shynrang hadien ba ka la lah ban pynliem noh ïa ka Nehru Memorial Higher Secondary School lyngba ka tie-breaker da 17-16 kol.
Wat la ka jingïakhun ka la long kaba itynnad bad kaba ïakhaid bha, hynrei haduh kaba kut jong 90 minit kine ki kynhun ki la ïathep mar shi kol. Ka Nehru Memorial ka la ïoh ban pynkhih jar nyngkong eh lyngba u Koperson Kyrsian ha ka minit kaba 19, hynrei u Banteilang Malieh u la lah ban pynïakhaid kylla na ka bynta ka skul Nongkri ha ka minit 31.
Haba phai sha ka Under-15 shynrang, ka Mawtneng Upper Primary ka la lah ban pynliem noh ïa ka Mynken Christian Higher Secondary School da 1-0 kol bad kane ka la wan urlong lyngba u Malong Boy uba la thep ha ka minit kaba 49.
Ha katei ka sngi la wan ban sakhi lang da u Assistant Director ka tnat ïalehkai ka Sorkar Jylla, Bah Khroobok Passah kum kongsan ryngkat u Bah Charles Syngkli, MLA ka Mawhati, kum-juh u Bah R.B Shadap, President ka Ri Bhoi District Sports Associa-tion nalor kiwei pat ki ‘riew rangbah.
Lyngba kane ka nam jop ka Nongjri Presbyte-rian kan phah ar tylli ki kynhun ban mihkhmat sha ka State Level Subroto Mukherje Cup 2025 ka ban sa long shen ha ka nongbah Shillong lem bad ka Mawtneng Upper Primary & Secondary School.
