Shillong, Jylliew 17
Ka Sorkar Jylla ka la mang pisa haduh T.7.03 klur na ka bynta ban pynitynnad bad ban pyn-khuid ïa ka um ha Nan Polok lane ka Ward’s Lake kaba don hapdeng ka nongbah Shillong, ban kyntiew shuh shuh ïa kane ka jaka kum kawei na ki jaka jngohkai.
Haba pyntip ïa kane ha ka Sngi Ba-ar, u Myntri ka tnat Jngohkai ka Jylla, Bah Paul Lyng-doh u la ong, ba lyngba ka tnat Pynroi Sor (Urban Affairs) ka Sorkar ka la mang T.7.03 klur na ka bynta ban pynitynnad ïa ka Nan Polok kynthup ka jingpynkhuid ïa ka um ba don ha ka pung.
U Myntri u la ong, ïa kane ka rai la shim na ka bynta ban khring shuh shuh ïa ki nongwan shangkai pyrthei hapoh ka Jylla.
U Bah Paul u la pyntip ba ka tnat ka la dep pynmih ïa ka Tender ban pynkhuid ïa ka um kaba don ha ka pung bad ki kam kin sdang ha ki 2-3 taïew ban wan.
“Ïa ka um kaba don ha ka pung yn pynkhuid da ka teknologi ba la tip kum ka ‘Nano Bubbles’ bad hadien ba la pynkhuid ïa ka um ba don ha ka pung, ka um kan long kaba khuid bha,” u la ong.
Nalor kane, u Bah Paul u la pyntip ruh ba tang shu kut ka aïom slap kin sa lah ruh ban sdang noh sa ïa ka ‘Light and Sound Show’ ha Nan Polok ïa kaba la mang kumba T.4 klur ban pyntrei.
U la ïathuh ba ka jingkhot Tender na ka bynta kane ka kam ruh kan sa sdang noh shen bad ïa kane ka projek yn pyndep hapoh 6 bad 8 bnai.
U Myntri u la ïathuh ba ka tnat ka la pynkhreh ruh ban phah shna ïa ki jaka leit bar kiba paka na ka bynta ki paidbah kumjuh na ka bynta ki nongwan jngohkai pyrthei ha ki 10-12 tylli ki jaka ba la jied.
“Ka tnat ka la mang mar T.25 lak ban shna ïa ki jaka leit shabar ha ki 10-12 tylli ki jaka kum ha Umïam Lake, Nan Polok, Sohra, Dawki bad kiwei kiwei ki jaka,” u la ong.
