Shillong, Jylliew 17
U coach ka kynhun ki ‘thei ïalehkai (senior) jong ka ri India u Crispin Chettri u la pynbna ïa ki kyrteng jong 24 ngut ‘thei ïalehkai ban leit sha Thailand na ka bynta ka AFC Women’s Asian Cup Australia 2026 Qualifiers.
Ïa ka thup kaba khatduh jong 24 ngut ki ‘thei ïalehkai na ka bynta katei ka lympung ïaknieh yn sa pynthikna shwa ban sdang ka jingïalehkai. Ha katei ka lympung ïaknieh, ka India ka la don ha ka Group-B bad kan ïakynduh pyrshah ïa ka Mongolia ha ka 23 tarik mynta u bnai, kumjuh ïa ka Timor Leste ha ka 29 tarik, Iraq ha ka 2 tarik u Naitung bad ïa ka Thailand ha ka 5 tarik.
Ki kynhun nongjop kin ïoh rung sha ka wat khatduh jong kane ka lympung ka ban long ha Australia ha u Lber 2026. Kane ka Women’s Asian Cup ka long ruh kum ka jaka ïakhun na ka bynta ka FIFA Women’s World Cup Brazil 2027.
U Chettri lem bad ka kynhun kin poi sha Thailand ha ka janmiet jong ka Lah Sngi U Blei, bad kin kilan met na ka bynta shi taïew ha ka nongbah Chiang Mai kaba don shatei lam mihngi shwa ka jingïalehkai kaba nyngkong. Baroh ki jingïalehkai kin long ha madan ïalehkai kaba la 700 snem jong ka Chiang Mai Stadium. Ka India kan leit kilanmet ha Padukone-Dravid Centre for Sports Excellence ha Bengaluru na ka bynta hynriew taïew, bad kum shi bynta ban pynkhreh ïa kane ka lympung ïaknieh, ka la ïoh ban ïalehkai paralok pyrshah ïa ka Uzbekistan ha ka 30 tarik u Jymmang bad 3 tarik mynta u bnai, ha kaba ka la shah rem da 0-1 kol ha baroh ar tylli ki jingïakhun.
